Kơxo lơ 6/4, a Hà Nội, Khu pơkuâ tung khu cheăng Đảng ƀô̆ tơpui kâ tơkŭm po Rôh hôp mơgei 10 hơnăm pêi pro Pơkâ Tơnêi têa 8, hneăng 11 ‘na “Tơdroăng tung la ngiâ rak vế Tơnêi têa tung tơdroăng nếo”. Pôa Võ Văn Thưởng, Ngế cheăng tung khu xiâm kal kí, kăn xiâm hnê ngăn tơnêi têa, Kăn pơkuâ Khu hnê mơhno mơgêi Pơkâ veăng hôp ƀă hnê mơhno a rôh hôp.

Tơpui hnê mơhno a Rôh hôp, pôa Võ Văn Thưởng, kăn xiâm hnê ngăn tơnêi têa hnê mơhno kơvâ tơpui kâ kal mơdêk rơdêi tơpui tơno ‘na cheăng kâ tơƀrê, ai pơxúa, veăng kum mơdêk ivá ai hlâu tơnêi têa; mơdêk khât ivá nếo dêi tơnêi têa, mơdêk tâ nếo hnoăng cheăng tơnêi têa. Kơvâ cheăng kal pơtối tơrŭm krá tơniăn ƀă tơdroăng ki gâk kring pơle pơla cheăm bêng, gâk kring ƀă rêm râ kơvâ cheăng mơdêk tâ nếo hnoăng cheăng hriăn ngăn, tối tơbleăng, tí tăng ‘nâi plĕng tơdroăng cheăng tung la ngiâ vâ pêi pro châ tiô tơdroăng ki pơkâ thế rak vế Tơnêi têa tung tơdroăng nếo; ôh tá la lâi pơtê mơdêk bro, ‘mâi rơnêu Đảng tung tâi tâng ‘na tơdroăng kal kí, hiâm mơno, túa rêh ối; hnê tơ’nôm, hriâm pât kăn ƀô̆, đảng viên ‘na ivá khên tơnôu ‘na tơdroăng cheăng kal kí, tơdroăng ki rơkê ‘na ivá cheăng pêi pro châ tiô tơdroăng ki pơkâ thế mơjiâng tơpui kâ Việt Nam krá rơdêi, rơkê, tâi tâng, rơkê plĕng.