Pơtroh rơkong rơkâu tơniăn lĕm troh mâu ƀok thái pơkeăng drêng Hâi ƀok thái pơkeăng Việt Nam, Kăn xiâm hnê ngăn tơnêi têa Võ Văn Thưởng tối nhên, cheăng khăm pơlât cho cheăng ki kơnía, rak vế, rak ngăn ivá ăm kuăn pơlê ƀă djâ vế ăm mâu rơpŏng hngêi, pơlê pơla mâu tơdroăng ki ƀriê kơhnâ.

Kăn xiâm hnê ngăn tơnêi têa rơhêng vâ mâu ƀok thái pơkeăng Hngêi pơkeăng Nhi đồng 1 mơdêk khât mâu tơdroăng ki hiăng pêi pro klêi tung pơla hdrối nah; tơdrêng amê hlối mơ-eăm, pơtối pêi pro châ tơƀrê mâu tơdroăng ki ƀlêi chiâng nếo xua tơdroăng ki tơƀrê mê drêng lâi xuân pơkâ thế ai tơdroăng ki pơloăng mơnúa nếo vâ tơkâ luâ, pâ thế tơdroăng ki mơ-eăm ôh tá la lâi pơtê.

Kăn xiâm hnê ngăn tơnêi têa pơchân kăn pơkuâ pơlê kong kân, rêm râ pơkuâ, mâu kơvâ cheăng tơmâng ngăn, mơdêk tơdroăng rêh ối ăm mâu ƀok thái pơkeăng, mâu ngế cheăng ‘na kơvâ khăm pơlât; pôi tá la lâi pơtê roê tơ’nôm mâu kơmăi kơmok ki nếo, kế tơmeăm xúa tung khăm pơlât; tơtrŏng troh tơdroăng ki pơtối hnê mâu ƀok thái pơkeăng ki kal má môi cho pơtroh mâu ƀok thái pơkeăng hơnăm ối nếo lăm hriâm xo tơdroăng ki rơkê plĕng tung khăm pơlât a mâu kong têa ki rơkê ‘na khăm pơlât vâ mơnhông ƀlêi chiâng Khôi hmâ dêi Hngêi pơkeăng tung la ngiâ.