A tíu xiâm ngăn pơkeăng pơlât tơring Thanh Liêm, Kăn xiâm hnê ngăn tơnêi têa hiăng pôu ngăn túa pơkâ tơdah mâu ngế ki khăm pơlât ing theh căn cước công dân teăng ăm theh baoh hiêm khăm pơlât, môi túa pơkâ pro pơxúa hên ăm mâu ngế ki châi tamo, malối cho kơdroh iâ chôu phut ăm tá ƀok thái pơkeăng ƀă ngế ki tamo.

Drêng tơbâ Hâi Ƀok thái pơkeăng Việt Nam, teăng mâ kăn pơkuâ Đảng, Tơnêi têa, Kăn xiâm hnê ngăn tơnêi têa Võ Văn Thưởng pơtroh rơkong rơkâu tơniăn lĕm má môi, tơdroăng nhuô̆m kơnía khât, hiâm mơno pâ mơnê troh mâu ƀok thái pơkeăng, kăn ƀô̆ cheăng ‘na khăm pơlât tơring Thanh Liêm ƀă kong pơlê Hà Nam.

Kăn xiâm hnê ngăn tơnêi têa mơnhên tối ing tíu khăm pơlât cheăm ngi klêng dêi tơring hiăng pêi pro tro mâu tơdroăng pơkâ dêi tơnêi têa ‘na khăm pơlât, pâk pơkeăng hbrâ mơdât pơreăng, rak ngăn pơlât ivá, tiâ mơnhên ivá ăm mâu phô̆m vâ xông kân, khăm séa ngăn ƀă rak ngăn mâu ngế ki ki tro pơreăng ki ôh tá chiâng lĕm.

Kăn xiâm hnê ngăn tơnêi têa tối tiah kố, tâng khăm pơlât a cheăm pơlê pêi cheăng tơƀrê kô veăng kum mơjiâng bro môi tơdroăng cheăng tung la ngiâ krá tơniăn ăm kong pơlê ƀă tơnêi têa.

Kăn xiâm hnê ngăn tơnêi têa pơkâ thế mâu râ Đảng, kăn pơkuâ ƀă kơ koan ki ai tơdjâk troh dêi kong pơlê Hà nam, tơring Thanh Liêm pơtối tơmâng ngăn vâ ‘no liăn bro hên tâ nếo ăm khăm pơlât tiô troăng tơkŭm ‘no liăn bro, ngế pêi cheăng, ing mê, mơdêk ki rơkê tung khăm pơlât a tíu khăm pơlâ cheăm; pơtối ‘no liăn roê kế tơmeăm xúa tung khăm pơlât, mơjiâng bro hngêi pơkeăng rơkê, hmâ achê, ngiât krúa lĕm.