A roh tơpui tơno, péa ngế kăn xiâm pơkuâ kheăn kơdeăn tơdroăng mơnhông dêi tơrŭm pơla péa pâ tung pơla kố nah, ki rơhêng vâ tối klêi kơ’nâi mơdêk chiâng tơrŭm cheăng ton xŏn hơnăm 2015. Tơrŭm cheăng kal kí, tơpui kâ ƀă kong têa ê rế hía rế mơdêk rak mâu roh trâm mâ, tơpui tơno khu râ kăn xiâm ƀă mâu khu râ; mâu troăng tơrŭm cheăng pơla péa pâ châ pêi pro châ tơƀrê.

‘Na mơnhên troăng prôk la ngiâ mơnhông tơrŭm cheăng péa tơnêi têa tung la ngiâ, péa râ kăn pơkuâ môi tuăn thăm tâ mê nếo tơrŭm cheăng kal kí, tơpui kâ ƀă kong têa ê ing thăm tơpui tơno roh lăm pôu pêi cheăng ƀă trâm mâ khu râ kăn xiâm ƀă mâu râ; rơtế tơrŭm mơjiâng tơdroăng po rơdâ pêi pro tơrŭm cheăng ton xŏn hneăng hơnăm 2025 – 2030.

‘Na tơdroăng têa kơxĭ Biển Đông, péa pâ tơkêa rak ƀă mơdêk hơniâp lĕm, gâk kring, tơniăn krá, tơniăn lĕm ƀă tơ’lêi hlâu pơto tơmeăm drô têa kơxĭ ƀă troăng tơƀai; kơbông krếo rêm pâ mơdât hiâm ki tô, ôh tá mơnhâu ‘na ivá ó rơdêi ‘na cheăng lêng lơ xúa mâu lêng tơplâ, nhuô̆m tŭm mâu tơdroăng tơpui kâ ƀă kong têa ê, luât, tơleăng tơxup tơbriât ƀă hơniâp lĕm, ing xiâm kối pơkâ xiâm dêi luât lâp plâi tơnêi, tung mê ai Tơkêa Luât têa kơxĭ hơnăm 1982 (UNCLOS).