Hâi mơdĭng Mơngiơk Hơngui tung lâp kơpong Tơnêi têa cho tơdroăng ki châ tơkŭm po rêm hơnăm, vâ ô eăng mâu tơdroăng ki kơnía túa lĕm tro khôi hmâ tơniăn lĕm dêi mâu hdroâng kuăn ngo tung tơdroăng túa lĕm tro khôi hmâ dêi pơlê pơla 54 hdroâng kuăn ngo, tơdrêng amê hlối veăng kum thăm mơdêk khu tơrŭm hdroâng kuăn ngo a “Hngêi tơdjuôm”.

Hâi mơdĭng hơnăm kố ai tơdroăng ki veăng dêi dâng 300 ngế hdroâng kuăn ngo dêi 28 pơlê pơla hdroâng kuăn ngo, lo ing 16 to kong pơlê, pơlê kong kân ƀă 16 khu pơlê pơla hdroâng kuăn ngo ƀă hên ki ê ƀă hên tơdroăng ki kal, môi tiah: Tơdroăng “Bài ca mừng Đảng quang vinh, mừng Xuân đất nước”, Têt pêt loăng plâ rơxông pâ troh hnoăng Pôa Hồ, Tơdroăng “Xah hêi Rơnó Hơngui” tơbleăng tơdroăng ki xah hêi chal krâ, hiâm mơno khôi hmâ, pế pơchên kế kâ khôi hmâ hâi Têt ƀă hên tơdroăng ki ê.

Drêng kố, Kăn xiâm hnê ngăn tơnêi têa Võ Văn Thưởng diâp tơmeăm ăm ngế ki teăng mâ mâu hdroâng kuăn ngo veăng tung Hâi mơdĭng ƀă kuăn pơlê hdroâng kuăn ngo ai mâu kế tơmeăm túa lĕm tro, ngê̆ thuât xua vâi krâ nhŏng o pro xêh, diâp ăm kăn xiâm hnê ngăn tơnêi têa, mơhno hiâm mơno dêi kuăn pơlê mâu hdroâng kuăn ngo ƀă Kăn xiâm hnê ngăn tơnêi têa.

Kăn xiâm hnê ngăn tơnêi têa hiăng pêt loăng chôu vế plâ rơxông pâ mơnê troh hnoăng Pôa Hồ; chôu nhăng a hngêi Chuô Khmer tung plông Pơlê Túa lĕm tro - Ôm hyô mâu hdroâng kuăn ngo Việt Nam