Kăn xiâm hnê ngăn tơnêi têa Võ Văn Thưởng ƀă kơdrâi pôa veăng trâm mâ tung roh kố. Xông tơpui a roh trâm mâ kố, teăng mâ Khu kăn xiâm pơkuâ hnê ngăn Đảng, Tơnêi têa, Măt trâ̆n Tơnêi têa Việt Nam, Kăn xiâm hnê ngăn pơtroh rơkong tơpui tối troh mâu kuăn pơlê dêi Việt Nam ki dế rêh ối, pêi cheăng, hriâm tâp a kong têa ê, tơdroăng ki êng, tơpui tơno tiah hmâ, ƀă hiâm tuăn hmâ achê ƀă mâu rơkong rơkâu apoăng hơnăm nếo lĕm tro má môi.

Kăn xiâm hnê ngăn tơnêi têa vêh mơnhên, Đảng, Tơnêi têa đi đo pói  rơhêng vâ kuăn pơlê pin ki dế rêh ối a kong têa ê pơtối mơdêk mâu hnoăng cheăng ki rơkê, ki plĕng, ki ‘nâi klê tơdroăng nếo, pêi pro châ ƀlêi chiâng hên tơdroăng, rêh kâ ối tơniăn, rế hiá rế ai hnoăng cheăng ki kân tung hnoăng luât, cheăng kâ, cheăng kal kí krá tơniăn tâ, tơrŭm trâu rơdâ ƀă mâu kong têa pú ki dế rêh ối.

Kăn xiâm hnê ngăn tơnêi têa pói rơhêng vâ tung la ngiâ, kuăn pơlê kô vêh pôu dêi tơnêi têa hên tâ vâ châ ngăn, châ hlo mâu tơdroăng ki hiăng hơ’lêh dêi tơnêi têa, mâu hnoăng cheăng ki kân tung hơ’lêh nếo, vâ rơtế veăng môi hiâm tuăn, ivá mơjiâng ƀă mơnhông Tơnêi têa Việt Nam mơjo pâ.