Kơxo lơ 29/3, Khu pơkuâ hnê ngăn Đảng pơlê kong kân Hà Nội hiăng po rôh hôp mơgêi 10 hơnăm pêi pro tơdroăng pơkâ Tơnêi têa 8 hneăng 11 ‘na hnoăng cheăng tung la ngiâ rak vế Tơnêi têa tung tơdroăng nếo. Pôa Võ Văn Thưởng, Kăn xiâm hnê ngăn Tơnêi têa hiăng troh veăng hôp ƀă hnê mơhno a rôh hôp, pôa Võ Văn Thưởng pơkâ thế pơlê kong xiâm Hà Nội pơkâ kơtăng rơdâ túa tơmiât: Mơnhông cheăng kâ rêh ối cho hnoăng cheăng ki xiâm, mơjiâng Đảng cho ki xiâm, mơnhông mơhno túa lĕm tro cho ivá hiâm mơno ƀă rak vế pơlê pơla, cheăm bêng, gâk kring cho tơdroăng ki kal, đi đo.

Pôa Võ Văn Thưởng, Kăn xiâm hnê ngăn tơnêi têa xuân pơkâ thế Hà Nội tŏng kum mơjiâng khu lêng kring vế tơniăn pơlê kong kân krá rơdêi, tâi tâng ƀă tơdroăng pơkâ kơxô̆ ngế pêi cheăng tơtro, ai hiâm mơno khên tơnôu ‘na tơdroăng cheăng kal kí krá rơdêi, môi hiâm mơno ƀă Đảng, ƀă Tơnêi têa ƀă kuăn pơlê; rơkê ‘na tơdroăng cheăng tơplâ, hnoăng cheăng, pêi pro tiô tơdroăng ki rơhêng vâ pêi pro tro hbrâ rơnáu tơplâ, rak vế krá rơdêi, pôi tá ăm pơlê kong xiâm kơdrâ trâm mâu tơdroăng.