Kơ’nâi lối môi măng tĭng tơbleăng túa pêi cheăng mâu kăn kong pơlê péa râ a mâu tíu pêi cheăng ki nếo, kơxê lơ 8/7, pôa Tạ Anh Tuấn, Kăn hnê ngăn Vi ƀan kuăn pơlê kong pơlê Dak Lak hiăng troh lăm séa ngăn vâ ‘nâi tơdroăng cheăng pêi a cheăm Krông Năng ƀă bêng Buôn Hồ.Pôa Tạ Anh Tuấn Kăn hnê ngăn Vi ƀan kuăn pơlê kong pơlê Dak Lak khê̆n kơdeăn ki mơ-eăm dêi râ ủy, mâu kăn cheăm Krông Năng ƀă bêng Buôn Hồ hiăng mơdêk ki pơxúa rak ngăn tơnêi têa, pêi cheăng ăm kuăn pơlê lĕm tro tâ.

Klêi séa ngăn, Kăn hnê ngăn Vi ƀan kuăn pơlê kong pơlê Dak Lak xuân tơmâng xo tối mâu tơdroăng xơpá, tơvâ tơvân a cheăm mê cho: tơdroăng xoăng kiăn ngân hrá pro tơdjâk troh ăm liăn khế kơ mâu ai hnoăng, mâu xơpá, mâu hiăng krâ; phần mềm chêh ‘măn tung kơmăi ai drêng ‘nâ tro xôi drêng tơdjêp ƀăng; luât pơkâ hnê mơhno ‘na chêh liăn ngân, ‘na ngế cheăng riân ngăn ‘na liăn râ cheăm, bêng hâi nhên, hâi hleăng.

Pôa Tuấn mơhnhôk mâu kăn ƀô̆ a Krông Năng ƀă Buôn Hồ pơtối mơ-eăm tơrŭm dêi rơpó, tơkâ luâ xơpá, pêi tro mâu hnoăng cheăng ki hiăng pơcháu, xoăng râ, xoăng hnoăng.