Klêi kơ’nâi vâ chê môi hơnăm tơpui tơno ƀă khu ki tơrŭm cheăng, troh khế 8 hơnăm kố, Kŏng ti pêi cheăng tiô rơnó Sản xuất – Thương mại – Dịch vụ Việt Thắng, cheăm Ea Kar, kong pơlê Dak Lak hiăng tê 25 rơpâu yêp chhá ngi kong têa Mih.

Tiah mê, klêi kơ’nâi hên hơnăm tơbriât ƀlêi chiâng ƀă yêp chêng khŏng chhá a Sinuâ, Philippines ƀă mâu kong têa ki ê a Đông Nam Á, khu mơdró kâ krê râ cheăm dêi Dak Lak hiăng châ tê troh hngế tơdế plâi tơnêi, hbrâ rơnáu ƀă tơdroăng ki xơpá ‘na tơxup tơbriât nếo.

Jâ Nguyễn Thị Dung, Kăn pơkuâ kŏng ti ăm ‘nâi, vâ tơxup tơbriât ƀlêi chiâng a kơchơ tê mơdró ki xiâm môi tiah Mih, pakĭng tuăn ngoâ rơkê tung xúa kong ngê̆, pơkuâ ngăn, khu mơdró kâ athế hbrâ rơnáu ‘na liăn ngân vâ thăm mơnhông ivá mơjiâng pro, pêi pro hâi khế pơkâ kok roê mâu tơmeăm ki nếo. Cho kong têa ki châ vâi lo tung plâ 20 hơnăm dêi mâu hngêi rak liăn a cheăm, jâ Dung loi tiah kố, Việt Thắng kô ai tŭm liăn ngân.

“Drêng tơmối kok roê mâu lô tơmeăm ki pơtối mê pơklât thế Việt Thắng athế po rơdâ hngêi kơmăi ƀă ‘no liăn roê tơ’nôm kơmăi kơmok vâ rak tơniăn ki têi kĭ ƀă khu tơrŭm cheăng. Mơhúa ai Agribank tíu pêi cheăng a Dak Lak đi đo rơtế tŏng gum, pro tơ’lêi hlâu ngin vâ châ xúa liăn ngân ki krâ kơvâ hơnăm vâ roê mâu kơmăi kơmok tơmeăm xúa ƀă hngêi ki pro tơmeăm khoăng. Hngêi rak liăn ăm mung liăn hiăng pro tơ’lêi hlâu ăm tơdroăng ki pro mơ-éa gá rĕng, tơ’lêi mâu rôh ki chĕn tơ’lêi”.

Ƀă Kŏng ti pêi cheăng tiô rơnó Thương mại Dịch vụ Xuất nhập khẩu Thế Kỷ, cheăm Dray Bhăng, kong pơlê Dak Lak, hâi khế sap ing pơxiâm pêi cheăng păn mơnăn mơnoâ troh chiâng môi khu mơdró kâ tê ngi kong têa ê, xuân ăm hlo ki kal dêi kơxô̆ liăn mung ƀă tơdroăng ki rơkê plĕng drêng xúa kơxô̆ liăn. Jâ Lê Thị Tuyết Sương, Kăn pơkuâ Kŏng ti tối, ki pơxúa dêi khu mơdró kâ mê cho chiâng vâ mơnhông ivá păn mơnăn mơnuâ, châ pro tơ’lêi hlâu tung tơdroăng mung liăn, klêi mê xing xoăng liăn rơkê ngi tơdroăng ki tê tơmeăm ngi kong têa ê.

“Tâi tâng kơxô̆ liăn á dế mung dêi hngêi rak liăn cho 3 rơtal. Apoăng á xo tiô rôh, vâ pro kơdroăng, roê hdrê păn, roê tâk. Klêi hiăng châ tê mâu tơmeăm ki á păn mê on veăng má nếo ‘no liăn tê mơdró pa gong”.

Ƀă ki xiâm dêi kơpong tơnêi ngăn tung tơdroăng ki rơdêi cho pêi chiâk deăng pro ivá, ki hên mâu khu mơdró kâ, rơpŏng mơdró kâ a Dak Lak hiăng pơxiâm pêi cheăng sap ing pêi chiâk, lơ ‘no liăn pêi chiâk hlối tê mơdró. Xua mê, kơxô̆ liăn mung pêi chiâk gá kal khât tung tŏng gum mơnhông cheăng kâ krê, tiô tơdroăng Pơkâ 68 dêi Khu xiâm pơkuâ tơdroăng kal kí. Ƀă vâ pêi pro hnoăng cheăng kố. Pakĭng mâu tíu pêi cheăng, ƀơrô pêi cheăng, hngêi rak liăn ối tơrŭm ƀă hô̆i khu râ mơjiâng lối hrĭng tôh mung liăn a mâu thôn, pơlê. Jâ H’Ley Sia Êban, kăn ƀô̆ kơdrâi cheăm Dray Bhăng, kong pơlê Dak Lak ăm ‘nâi, ing mâu hô̆i đoàn theh a cheăm, mâu tôh ngăn tơdroăng mung liăn hiăng gum kuăn pơlê hlo tơƀrê khât.

“Ing tơdroăng ki mơjiâng mâu tôh rak ngăn mâu ngế ki mung liăn mê hô̆i viên xuân môi tiah vâi krâ kuăn pơlê hiăng châ mung liăn tơ’lêi hlâu tâ, châ xúa tung mâu tơdroăng dêi tơná pin vâ. Luâ tâ mê nếo, Agribank hiăng po rơdâ kơxô̆ liăn hên tâ vâ pêi châ tơdroăng púi vâ po rơdâ tê mơdró dêi vâi krâ kuăn pơlê. Drêng ai liăn ngân mê vâi krâ vâi khên tơnôu mơnhông tê mơdró, mơnhông cheăng kâ dêi rơpŏng hngêi “.

Tiô pôa Lê Văn Thịnh, Kăn pơkuâ Agribank Tíu pêi cheăng Dak Lak, tung pơla Dak Lak hiăng tơdjêp ƀă têa kơxĭ, tê tơmeăm ngi kong têa ê a kong pơlê rế hía rế ai hên ki pơxúa, hngêi rak liăn kô ai mâu tơdroăng pơhlêh teăm tơdrêng vâ tŏng gum mơnhông ki pơxúa kố.

“La ngiâ ah, ngin kô ai mâu túa pơkâ pêi nhên ƀă ai mâu rôh ki châ trâm tơmối hên tâ, tơkŭm tung mâu kuăn pơlê ki tơdjâk troh tê tơmeăm pêi lo ing chiâk deăng tê ngi kong têa ê. Mê cho môi tung mâu tơdroăng ki kal dêi kong pơlê Dak Lak. Nôkố hiăng châ xúa ƀă hiăng ai mâu tơdroăng tơhrâ tơniăn ƀă dế pơkâ mơdêk mâu mơ-éa chêh pro tiô pơkâ. Tiô tối hdrối tung hơnăm 2025 kố kô athế thăm mơnhông, khŏm mơ-eăm pêi pro tơkâ luâ túa pơcháu dêi Khu xiâm ngăn liăn ngân”.

Ôh ti xê to ăm mung liăn, mâu hngêi rak liăn a Dak Lak hiăng ƀă dế “rơtế prôk” tơƀrê ƀă khu mơdró kâ ƀă kuăn pơlê. Ing mâu tơkêa ki tê tơmeăm pêi lo ing chiâk deăng ngi kong têa ê troh mâu túa pơkâ cheăng kâ rơpŏng hngêi a mâu pơlê cheăm, tâi tâng dế veăng gum mơnhông krá tơniăn cheăng kâ cheăm pơlê, mơdêk tơdroăng rêh ối kuăn pơlê ƀă tối rơdêi hnoăng cheăng xiâm dêi cheăng kâ krê.