Kong pơlê Lâm Đồng hiăng pơxiâm mơjiâng pro Tơdroăng tơkêa bro Tíu xiâm hnê pơtâp ivá Tơnêi têa a Đà Lạt. Tơdroăng tơkêa bro xua Khu xiâm mơhno túa lĕm tro, Tơ’noăng ivá ƀă Ôm hyô pro pơkuâ, châ mơjiâng tung ƀăng deăng lối 10 ha a bêng Langbiang – Đà Lạt, tâi tâng kơxô̆ liăn mơ’no liăn cheăng vâ chê 300 rơtal liăn.

Tơdroăng tơkêa bro 3 kơpong ki xiâm: B1, B2 ƀă B3. Tung mê, kơpong B3 nếo mơjiâng ai ƀăng deăng vâ chê 3,5 ha, mê cho tíu klê têa ai kế ki tât kong tô, kơpong pơtâp golf. Kơpong B2 ai ƀăng deăng lối 3,7ha, ai kơpong hngêi tơ’noăng ki chiâng xúa hên tơdroăng hiăng châ mơjiâng khế 10/2023 ƀă tiô tối hdrối kêi đeăng mơ’nui hơnăm kố.

Kơpong B1 châ mơjiâng pro vâ mơjiâng pro kơpong hngêi ối ăm thái hnê, ngế ki rơkê hnê pơtâp ƀă ngế ki tơ’noăng, rơtế ƀă mâu tíu tŏng gum, tiô tối hdrối pơxiâm mơjiâng pro a mơ’nui hơnăm 2026. Tơmeăm kố châ mơ’no liăn cheăng tiô troăng rơxông nếo ƀă tơdâng tơ’mô, tơniăn mâu pơkâ tơtro tơnêi têa ƀă lâp plâi tơnêi.

Tơmeăm kum ăm thái hnê, tơ’noăng ivá châ tơƀrê hên ƀă troh lâp lu tơdroăng pơtâp ivá tung kuăn pơlê, tơdjêp ƀă mơnhông ôm hyô ƀă khôi túa lĕm tro, veăng kum tơtêk cheăng kâ – rêh ối pơlê pơla dêi tơnêi têa tối tơdjuôm, dêi Lâm Đồng ƀă kơpong tối krê.