Tung tơdroăng koh phiu ro Kăch măng khế Tơheăm ƀă Hâi mơjiâng tơnêi têa lơ 2/9, kơxo lơ 20/08, a Tíu xiâm Hneăng hôp Tơnêi têa, Leh tơbâ 80 hơnăm hâi Mơjiâng Chin phuh (28/8/1945 – 28/8/2025) châ tơkŭm po kân krip. Vêh tơbâ tơdroăng roh ton nah, pôa Phạm Minh Chính, Ngế pro xiâm hnê ngăn tơnêi têa tối nhên: Hâi lơ 28/8/1945, Chin phuh pơtân tơnêi têa Việt Nam Yân chuh Kŏng hoa hiăng tơbleăng hdrối kuăn pơlê kơdrâm xuân môi tiah lâp plâi tơnêi ‘na tơdroăng mơjiâng Chin phuh nếo ƀă tơbleăng inâi 15 ngế xua Pôa Hồ Chí Minh, Kăn xiâm hnê ngăn tơnêi têa pro Kăn xiâm, mơnhên tơdroăng ki mơjiâng dêi Chin phuh Kăch măng apoăng tung plâ ki xŏn tơdroăng roh nah rơpâu hơnăm mơjiâng ƀă rak tơnêi têa dêi hdroâng mơngế.

Tung plâ 80 hơnăm, tơkâ hluâ hên hneăng pá puât, tơbrêi tơbrêh ƀă hên pơloăng mơnúa, laga ing pơkuâ rơkê dêi Đảng, Chin phuh hluâ mâu hneăng cheăng hiăng mơhno inhên hiâm mơno khŏm mơ-eăm, mơ-eăm kân, pêi kơtăng, rơtế kuăn pơlê, mâu lêng lâp tơnêi têa châ mâu tơdroăng châ tơƀrê kân, ai kơnâ khât tơdroăng mơnhông mơdêk tung tâi tâng mâu kơvâ.

Tơtrŏng má môi, Chin phuh tơkŭm pêi pro kơtăng, châ tơƀrê troăng hơlâ rah xo bro lế lĕm tro khu pêi cheăng kal kí iâ tro mơngế, pêi cheăng xêt khât, châ tơƀrê ƀă mơjiâng troăng pêi khu râ kăn pơkuâ 2 râ ƀă Mơnhông tâi tâng tơnêi têa. Xông tơpui hnê mơhno a roh leh, pôa Tô Lâm, Kăn xiâm pơkuâ hnê ngăn Đảng pơkâ thế ƀă pói vâ mâu kăn teăng mâ pơtối rơtế Chin phuh krá tơniăn kơteăng djâ Tơnêi têa mot chal nếo – Chal mơ-eăm mơnhông kro mơdrŏng rơdêi, rơkê, mơnhông rơdêi dêi hdroâng mơngế.