Tung lâp kong pơlê ai 8.915 rơpŏng kuăn pơlê châ tơniăn ‘na hngêi ối, hiăng mot ối tung mâu hngêi ki lĕm kâk, mê cho 6.828 toăng châ pro nếo ƀă 2.087 toăng ‘mêng hngêi ki ton. Rêm toăng hngêi ki châ pro nếo mê châ gum dâng 80 rơtuh liăn, ‘mêng hngêi ki ton châ gum dâng 30 rơtuh liăn.

 Tung kơxô̆ 4 tơdroăng tơkêa têa tah hngêi ối pơtân, xi kơchoh, Kŏng an kong pơlê Dak Lak pơkuâ po môi tơdroăng tơkêa ƀă 4.825 toăng, tâi tâng kơxô̆ liăn ‘no pro cho 342 rơtal, pro klêi rĕng tâ tơdế khế tâng vâ pơchông ƀă túa pơkâ. Pái tơdroăng tơkêa bro ki u ối xuân hiăng pro klêi tơkâ luâ túa pơkâ. Tơdroăng ki hiăng pro klêi tơdroăng kố ôh ti xê gum mâu rơpŏng kơtiê, vâ chê kơtiê, rơpŏng châ tơnêi têa gum ƀă rơpŏng kuăn pơlê hdroâng kuăn ngo tơniăn ai hngêi ối mê ối tối nhên tơdroăng tơmâng ngăn dêi Đảng, Tơnêi têa tung hnoăng cheăng tŏng gum rêh ối pơlê pơla, pro chiâng ivá vâ kuăn pơlê mơ-eăm mơnhông cheăng kâ.