A rôh hôp, teăng mâ mâu khu mơdró Việt Nam ƀă Sinuâ hiăng tơpui ‘na troăng hơlâ mơdêk ƀă pro tơniăn, krá ton tơdroăng tê tơmeăm pê lo ing chiâk deăng ăm kong têa ê tung la ngiâ. Tung mê, mâu khu mơdró Việt Nam púi vâ châ kơjo kum rĕng ‘nâi plĕng teăm tơdrêng mâu luât pơkâ tŏng gum, pơkâ tro kih thuât, pơkâ ki nếo ƀă ing Tíu xiâm Tơnêi têa. Pakĭng mê, ai ƀâng tối đi đo vâ teăm tơdrêng ‘mâi hơ’lêh pêi.

Peăng Sinuâ, hên khu mơdró tối tiah kố, Gia Lai kal tơmâng khât tâ troh tơdroăng tơniăn tơmeăm ki ai vâ tê,  pêi lĕm tơ’mô ƀă kô chiâng uâ pơliê pro trâu vâ mơdêk ki pơxúa. Jâ Lư Lệ Phương, Ngế pơkuâ mơdró kâ dêi Grup ‘no liăn pêi cheăng kung king têa kơxĭ Ƀắc Bộ (kong pơlê Quảng Tây, Sinuâ), ăm ‘nâi:  

“Ƀă khu mơdró dêi Sinuâ, kal tơmâng khât troh kơpong pêi pêt ƀă tơmeăm ki pê lo dêi Việt Nam hôm krá lĕm. Ai hên túa tơmeăm. Hâi kố, troh akố, á vâ tăng ‘nâi tơ’nôm kơpong pêi pêt dêi Việt Nam tơdroăng tơbleăng pêi môi tiah lâi, rak ngăn ‘na tơdroăng pêi lo tê rôe môi tiah lâi. Vâ mơdêk châ tê hên ăm peăng kong têa Sinuâ thế ai séa ngăn, uâ pơliê, pro ‘măn, kơxuô tâ tung kơthung chêh hleăng nhên tíu xiâm pêi lo”.

A rôh hôp, rêm pâ vâ môi tuăn khât ‘na tơdroăng kal mơjiâng mâu ƀâng tơdjêp tơdrêng, kơdroh khu ki ối tơdế rá, hlối mơhnhôk tơrŭm cheăng tung kơvâ logistic. Jâ Nguyễn Thị Diễm Hằng, Kăn pơkuâ Kŏng ti veăng tơ lo liăn Vinanutrifood Bình Định, ăm ‘nâi  hiăng ai hên khu mơdró Việt Nam mot trâu a kơchơ mơdró Sinuâ ƀă hlối hlê nhên mâu luât pơkâ ki tơdjâk troh. Kố cho tơ’lêi hlâu kân vâ mơnhông mâu kơpong pêi lo tơmeăm châ mơnhên lĕm a Gia Lai.

“Ngin hiăng tăng ‘nâi taih kố ki kal má môi cho thế tơdrăng ing rak ngăn  kơpong pêt troh hngêi kơmăi uâ pơlê, ‘măn, pro. Ki kal má môi dêi pin cho tê mâu tơmeăm ki Sinuâ kal vâ. Ngin xúa AI, chêh tơ’mot mâu tơdroăng tung kơmăi dêi Sinuâ, tối hdrối ‘na mâu tơmeăm pê lo tung hơnăm, rơnó ki pêi lo tơmeăm tơrŭm ƀă kơpong pê lo tơmeăm Việt Nam vâ djâ tơbleăng mâu tơmeăm tro tiô rơnó ƀă bê tŭm tơmeăm tê ăm kơchơ mơdró”. 

A rôh hôp, hiăng ai 7 hlá mơ-éa chôu pâ tơrŭm cheăng châ kĭ pơla khu mơdró Gia Lai ƀă Khu mơdró Sinuâ. Pôa Nguyễn Tuấn Thanh, Phŏ Kăn hnê ngăn Vi ƀan kong pơlê Gia Lai tối, kong pơlê dế tơkŭm pê klêi tơdâng mâu tơdroăng vâ pro tơ’lêi hlâu má môi ăm khu mơdró, tung mê ai mâu khu ‘no liăn cheăng dêi kong têa ê ƀă khu mơdró Sinuâ.

“Kong pơlê Gia Lai tơmâng khât á pêi klêi troăng prôk tung kong pơlê, tơmeăm khoăng mâu kơpong kơmăi kơmok, tơdroăng cheăng ‘mâi pro hlá mơ-éa ‘na ‘no liăn mơjiâng tơmeăm khoăng mâu kơpong hngêi kơmăi, tơdroăng cheăng ‘mâi hơ’lêh túa pro hlá mơ-éa ‘na ‘no liăn pro troăng prôk, pro hnoăng mơhá, tíu tê mơdró kăng kong. Troh ƀă Gia Lai, mâu khu mơdró, mâu khu ‘no liăn mơjiâng tơmeăm khoăng kô pro hlâu vâ pêi tơdroăng tơkêa bro klêi tơniăn ƀă mơnhông krá ton’’.

Nôkố, Gia Lai ai vâ chê 1 rơtuh ha tơnêi pêi chiâk ƀă mâu kơpong pêt loăng plâi kâ. Tung mê, kơphế cho loăng plâi pêt ki xiâm, ƀă lối 107.000ha, tơmeăm pê lo rêm hơnăm lối 333.000 tâ̆n. Mâu loăng plâi môi tiah sầu riêng, tiu, loăng plâi hôt, kơxu, priât, krui kơxái, pôm ló, plâi ‘lâu, hăng... xuân ai tơnêi pêt rơdâ péa pái rơpâu troh chât rơpâu ha, ai tiô mâu pơkâ tê ăm kong têa ê.