Kăn xiâm phŏ hnê ngăn Kuô̆k hô̆i Nguyễn Đức Hải rơhêng vâ Đảng ƀô̆, khu kăn pơkuâ ƀă kuăn pơlê kong pơlê Quảng Nam pơtối rak vế mơdêk tro ki pơxúa dêi Kơbong chôu vế Kăn xiâm hnê ngăn Hô̆i đong Tơnêi têa Võ Chí Công vâ tíu kố chiâng môi tíu ki kal xiâm ‘na hnê hriâm khôi hmâ kăch măng ƀă hiâm mơno pâ nhuô̆m tơnêi têa ăm mâu rơxông kuăn pơlê Việt Nam.

Drêng rôh Têt khôi hmâ dêi hdroâng mơngế, Kăn xiâm phŏ hnê ngăn Kuô̆k hô̆i Nguyễn Đức Hải diâp 20 hnoăng tơmeăm Têt ăm 20 rơpŏng ki xơpá a cheăm Tam Xuân 1, tơring Núi Thành, kong pơlê Quảng Nam. Kăn xiâm phŏ hnê ngăn Kuô̆k hô̆i rơhêng vâ mâu rơpŏng mê mơeăm tơkâ luâ xơpá, kơhnâ pêi cheăng kâ, veăng kum tơdjuôm tung tơdroăng mơnhông dêi kong pơlê Quảng Nam.