Tối tơbleăng a rôh pêi cheăng a kong pơlê Bến Tre, Kăn xiâm phŏ hnê ngăn tơnêi têa Võ Thị Ánh Xuân phiu ro hlo hơnăm nah, tơnêi têa pin hiăng tơkâ luâ hên tơdroăng xơpá, pơloăng mơnúa vâ châ pêi tơƀrê mâu tơdroăng ki kal tung tâi tâng mâu kơvâ cheăng. Kăn xiâm phŏ hnê ngăn tơnêi tea pơkâ thế Đảng, Tơnêi têa, mâu kăn ƀă kuăn pơlê Bến Tre pơtối mơ-eăm hên tơdroăng hiăng châ pêi tơƀrê mâu pơkâ ki Hneăng hôp rêm râ hiăng pơkâ; tơmâng ‘no liăn mơjiâng túa lĕm tro, ‘na tơdroăng rêh ối, ‘na pơkeăng pơkât, hnê hriâm, mâu tơdroăng ki pơxúa ăm kuăn pơlê, malối a mâu kơpong hngế hngo kơtiê xơpá, pơlê xiâm kăch măng.

Ing mê, vâ kuăn pơlê mơdêk ki tơƀrê tung rêh ối. Rôh kố, Kăn xiâm phŏ hnê ngăn tơnêi têa Võ Thị Ánh Xuân diâp ƀảng ki tơbâ ăm kong pơlê Bến Tre mơjiâng 10 toăng hngêi tuăn pâ, kơnâ 500 rơtuh liăn; liăn ‘măn kơdĭng kum vâi hdrêng Việt Nam ăm 200 rơtuh liăn kum vâi o kơtiê xơpá.

Pakĭng mê, diâp ăm 200 kơxu tơmeăm ăm mâu rơpŏng kơtiê, vâ chê kơtiê, mâu rơpŏng ai hnoăng tơnêi têa ki kơtiê xơpá; 200 kơxu tơmeăm ăm kŏng nhân mơngế pêi cheăng; 200 kơxu tơmeăm ăm vâi hdrêng kơtiê xơpá tung lâp kong pơlê, tâi tâng kơnâ 799 rơtuh liăn.