A rôh tơdah, Kăn xiâm phŏ hnê ngăn tơnêi têa Võ Thị Ánh Xuân tối phiu ro tơrŭm cheăng pơla Việt Nam – Hàn Quốc dế ối tung hneăng mơnhông tơniăn má môi; malối, trâm mâ kuăn pơlê péa tơnêi têa hlo tơniăn ro ƀă dâng 200 rơpâu ngế kuăn pơlê Việt Nam a rêm kong têa dế rêh ối cheăng kâ, hriâm tâp a kong têa ê, tung mê, ai dâng 80 rơpâu rơpŏng ai hên tơdroăng ki lĕm tro Việt – Hàn Quốc.

Kăn xiâm phŏ hnê ngăn tơnêi têa Võ Thị Ánh Xuân pơkâ thế, tung la ngiâ péa pâ pơtối tơrŭm tơbleăng, pêi pro hơ’lêh tơrŭm cheăng “Tơnêi têa tơrŭm cheăng tŭm têk Việt Nam – Hàn Quốc”, malối cho pêi pro “Tơdroăng tŏng kum ‘na tơbleăng tơrŭm cheăng tung la ngiâ tŭm têk Việt Nam – Hàn Quốc” hiăng kĭ a khế 6/2023.

Tơdrêng amê hlối mơdêk tơrŭm cheăng kal kí – tơpui kâ ing tơdroăng mơdêk pơtroh khu râ kăn ƀă rêm râ troh a tơnêi têa dêi rơpó, ing mê ‘mâi mơnhông hiâm mơno loi ngah tung tơdroăng kal kí ƀă pro trâu rơdâ tơrŭm cheăng pơla kăn pơkuâ rêm râ péa tơnêi têa; tơbleăng tơƀrê mâu troăng hơlâ tơrŭm cheăng, mâu tơdroăng tơkêa khu râ kăn pơkuâ pơla péa tơnêi têa.