Kố cho tơdroăng kal ki kal kum mơdêk ƀă pro trâu hơngế tâ tơrŭm cheăng nhŏng o ki kal, rŭm môi tuăn păng ‘nâng, tơrŭm tŭm têk pơla péa Đảng, péa Tơnêi têa ƀă kuăn pơlê péa tơnêi têa Việt Nam – Lếo.

A roh trâm mâ, péa kăn xiâm pơkuâ tối nhên khôi túa, vêa vong  vâi krâ nah mơnhông mơdêk, kum dêi pó; mơnhên tơrŭm cheăng Việt Nam – Lếo cho tơmeăm ki kơnía git dêi péa hdroâng kuăn ngo, cho ôh tá păng lôi, tiô pơkâ ƀă cho xiâm kối ivá ó rơdêi kân má môi dêi péa Đảng, péa tơnêi têa kal châ mơnhông mơdêk, pơtối rak ăm mâu rơxông kơ’nâi.

Kăn xiâm pơkuâ hnê ngăn Đảng Nguyễn Phú Trọng mơnhên, tơrŭm cheăng Việt Nam - Lếo rak hnoăng cheăng ki kal, kơjo má môi tung troăng hơlâ tơpui kâ ƀă kong têa ê dêi Việt Nam; tơdrêng amê tối rơdêi mâu tơdroăng xiâm ki kal vâ thăm tơrŭm cheăng pơla péa Đảng, péa tơnêi têa tung la ngiâ.

A roh trâm mâ, Ngế pro xiâm hnê ngăn Chin phuh Phạm Minh Chính ƀă Ngế pro xiâm hnê ngăn Chin phuh Lếo Xỏn-xay Xỉ-phăn-đon môi tuăn phiu nâ khât pơla péa Đảng, péa tơnêi têa kal pơtối thăm rŭm môi tuăn, mơdêk tơrŭm cheăng lêng – gâk kring ƀă tơpui kâ; mơjiâng tơtêk tung tơrŭm cheăng kâ; pơtối pơhlêh nếo, mơdêk châ tơƀrê tơrŭm cheăng tung mâu kơvâ cheăng, vâ thăm tâ mê nếo tơrŭm môi tuăn ki păng ‘nâng Việt Nam - Lếo, xua pơxúa păng ‘nâng dêi kuăn pơlê rêm tơnêi têa, xua vâ hơniâp lĕm, tơrŭm ƀă mơnhông dêi kơpong ƀă lâp plâi tơnêi.