Klêi kơ’nâi lăm pôu ƀơrô thĭ nghiê̆m hlối pro, tíu chôu kơxop hlá mơ-éa dêi Hngêi trung Đăi hok Việt Đức, Kăn xiâm pơkuâ kong têa Alơmăng ai ƀai xông tơpui a ngiâ sinh viên, giảng viên dêi hngêi trung. Pôa tối hâk tơngăm ‘nâng drêng troh Việt Nam, tơdrêng amê kheăn kơdeăn hnoăng ƀă ki kal dêi Việt Nam tung kơpong ƀă tung lâp plâi tơnêi.

Kăn xiâm pơkuâ kong têa Alơmăng tối hngêi trung Đăi hok Việt Đức cho tơdroăng tơkêa bro ‘’on séa troăng bâ’’ ăm tơrŭm cheăng pơla 2 tơnêi têa. Alơmăng kô pơtối tŏng kum Việt Nam tung tơdroăng mơdêk tơdroăng hnê mơjiâng mơngế pêi cheăng. Klăng roh lăm pôu pêi cheăng, Ngế xiâm pơkuâ cheăng pêi – Rêh ối pơlê pơla kong têa Alơmăng xuân hiăng trâm mâ sinh viên Hngêi trung Đăi hok Việt Đức.

Mâu khu tê mơdró kong têa Alơmăng xuân tơpui tơno ƀă giảng viên, sinh viên hngêi trung ‘na tơdroăng kal vâ rah xo mơngế pêi cheăng, pơkâ thế ‘na ivá dêi sinh viên klêi kơ’nâi mơgêi lo hngêi trung.