Kăn xiâm pơkuâ Vi ƀan Séa ngăn Tơnêi têa Trần Cẩm Tú hiăng hbru 50 kơxuô tơmeăm ăm mâu rơpŏng ki châ tơnêi têa tŏng kum, rơpŏng kơtiê dêi pơlê kong kơdrâm Lào Cai; 50 kơxuô tơmeăm ăm kŏng nhân ki ai tơdroăng rêh ối xơpá ƀă hbru tơmeăm ăm khu lêng kring vế kong pơlê Lào Cai.

Tơpui a rôh pôu, pôa Trần Cẩm Tú mơnhên tối khât tơdroăng tơrŭm, ivá mơ-eăm dêi Lào Cai tung môi hơnăm 2023 ai hên xơpá, pơloăng mơnúa. Tơdrêng amê hlối pơkâ thế khu râ kăn pơkuâ ngăn Đảng, khu kăn pơkuâ, Măt trâ̆n Tơnêi têa, mâu khu tơrŭm pơkuâ tơdroăng kal kí rêh ối pơlê pơla rêm râ kong pơlê Lào Cai kal tơkŭm hnê mơhno pêi pro tro tơdroăng pơkâ dêi Khu pơkuâ ngăn Đảng ‘na tơkŭm po Têt lo hơnăm nếo Giáp Thìn 2024.

Tơkŭm pêi pro tơƀrê mâu troăng hơlâ pơkâ dêi Đảng, Tơnêi têa ‘na hnoăng cheăng tŏng kum rêh ối pơlê pơla, tŏng kum xut tah hrâ mơnguâ kơtiê, malối cho mâu tơdroăng pơkâ dêi tơnêi têa ‘na mơjiâng thôn pơlê nếo, kơdroh kơtiê krá ton, mơnhông cheăng kâ rêh ối pơlê pơla kơpong hdroâng kuăn ngo ki iâ mơngế ƀă peăng kong ngo.