Kơ’nâi 15 hơnăm pêi pro tiô Hnê mơhno dêi Khu kăn xiâm Đảng ‘na mơnhông mơdêk pro ƀaoh hiêm khăm pơlât tung tơdroăng nếo nôkố, troh nôkố kơxô̆ mơngế pro ƀaoh hiêm khăm pơlât dêi kong pơlê Kon Tum châ lối 93%. Tung mê, kơxô̆ mơngế veăng rôe ƀaoh hiêm khăm pơlât tung mâu rơpŏng hngêi châ vâ chê 16%; tung lối 85% pơ’leăng mâ mơngế tung kong pơlê châ pro, rak ngăn hồ sơ khăm pơlât điê̆n tưh a hngêi pơkeăng cheăm ƀă tâi tâng mâu hngêi pơkeăng cheăng châ khăm, pơlât ƀă ƀaoh hiêm khăm pơlât.

Tối tơbleăng a rôh séa ngăn, pôa Vũ Thanh Mai, Kăn phŏ hnê mơhnhôk cheăng Xiâm tơnêi têa tối, pakĭng veăng gum ing tíu xiâm, vâ rak tơniăn ƀă pơtối pro vâ rế hên ngế châ xúa ƀaoh hiêm khăm pơlât, Kon Tum kal thế tối tơbleăng hên tâ ‘na luât pơkâ tŏng kum ƀă ki pơxúa dêi Ƀaoh hiêm khăm pơlât, mơnhông hngêi pơkeăng cheăm, malối tơkŭm mơdêk khăm pơlât, pro tơ’lêi hlâu ăm kuăn pơlê ki troh lăm pơlât châ pơlât ƀă tơmeăm ki hngêi pơkeăng ai.