Kơxo hâi lơ 7/4, Khu kăn xiâm ngăn ‘na pơkeăng pơlât xua pôa Trần Văn Thuấn -  Ngế xiâm phŏ ngăn ‘na pơkeăng pơlât pro ngế ki pơkuâ djâ khu kăn hiăng troh lăm pôu pêi cheăng ƀă Hngêi pơkeăng kân kơpong Tây Nguyên ‘na tơdroăng khăm pơlât ƀă tơbleăng rah ‘na rôe pơkeăng tung khu hngêi pơkeăng tơnêi têa. Tối tơbleăng ƀă Khu kăn lăm cheăng, pôa Nguyễn Đại Phong, Ngế pơkuâ Hngêi pơkeăng kân kơpong Tây Nguyên ăm ‘nâi, tung pơla hơnăm 2019-2022, Hngêi pơkeăng hiăng chôa pêi pro tơdâng mâu troăng rơhlâ vâ mơdêk tơdroăng xúa pơkeăng khăm, pơlât rế tơƀrê tâ.

Ki ăm hlo cho xúa kŏng ngê̆ thong tin, ‘mâi hơ’lêh ‘na pro hlá mơ-éa tung khăm pơlât; Pơ’lêh nếo tơdroăng tơdah khăm pơlât, mơdêk pêi cheăng lĕm tro dêi thái pơkeăng, kơjo kum mâu hngêi pơkeăng râ tơring, cheăm; Tăng rôe mâu tơmeăm kơmăi kơmok, mơdêk kih thuât nếo vâ ai pơxúa tung khăm ngăn vâ ‘nâi nhên tơdroăng châi ƀă pơlât tro tơdroăng.

Tối tơbleăng a rôh pêi cheăng, pôa Trần Văn Thuấn - Ngế xiâm phŏ ngăn pơkeăng pơlât tối tiah kố, Hngêi pơkeăng kân kơpong Tây Nguyên kal ai tơ’nôm mâu luât pơkâ tŏng kum tơtro, vâ tơdroăng pêi cheăng rế rơkê lĕm tro, tơrŭm môi tuăn dêi rơpó ƀă đi đo tơdjêp ƀă mâu Hngêi pơkeăng râ kơpêng vâ hnê hriâm ing hơngế vâ rế rơkê tung khăm pơlât râng mâu ngế cheăng khăm pơlât, ƀok thái pơkeă pôi tá  pơtê. 

‘Na tơdroăng cheăng tăng rah khu rôe pơkeăng, tơmeăm xúa tung khăm pơlât, Ngế pro xiâm phŏ ngăn pơkeăng pơlât ăm ‘nâi, nôkố hiăng ai hên luât pơkâ tah ki pá, ki kal Hngêi pơkeăng thế hôm ai ivá pêi tâi hnoăng cheăng ki mê há lơ ôh.