Tiô tơbleăng a roh pêi cheăng, klêi 5 hơnăm pêi pro, tơkŭm po pêi pro, tơdroăng pơkuâ tơnêi têa ‘na pơkuâ, gâk ngăn, mơnhông pêt kong châ pêi pro tơdâng tơ’mô, châ tơƀrê. Ing hơnăm 2017 troh nôkố, mâu kơ koan cheăng hiăng châ hlo, tơdah, pro hô sơ pơxâu phâk 6.500 roh pro xôi luât tung kơvâ loăng kong, tung mê pơxâu phâk liăn lối 6.100 roh. Tâng pơchông ƀă hneăng 2012 – 2016, kơxô̆ roh pro xôi kơdroh lối 44%. Tơdroăng pêt kong hiăng châ tơƀrê hên, klêi kơ’nâi 5 hơnăm, lâp kong pơlê pêt châ lối 12.400 ha, tung mê pêt kong ki vâ xo loăng mơdró châ lối 10.100 ha ki ê cho kong tât khía, kong rak kơnhŏng têa, kuăn kia kong loăng pơlái kong kế.

Xông tơpui a roh pêi cheăng, pôa Trần Tuấn Anh, Kăn pơkuâ cheăng kâ tơnêi têa pơkâ thế, Khu pơkuâ cheăng Đảng kong pơlê pơtối thăm pơkuâ dêi Đảng ƀă tơdroăng pơkuâ, gâk ngăn kong. Tung mê kal tơmâng hên tâ mê nếo tơdroăng cheăng, hnoăng cheăng dêi ngế ối a ko tung mâu roh tơdjâk pro xôi luât ‘na kong. Kong pơlê Dak Lak kal pêi pro kơtăng tơdroăng séa ngăn, mơnhên ƀă mâu tơdroăng tơkêa bro pêt mơjiâng kong, pơhlêh tơdroăng xúa tơnêi kong. Pakĭng mê, kong pơlê xuân kal ai mâu mơnhên tối hdrối tơdroăng, tung la ngiâ kơnó ‘nâi mâu pơloăng mơnúa ƀă mâu tơdroăng ki tơ’lêi ai tung pơkuâ, gâk ngăn, mơnhông pêt kong krá tơniăn.