Hơnăm 2023, tơdroăng pêi pro tơdâng tơ’mô pơla kơdrâi kơnốu pơtối châ tơdah tơdroăng tơmâng tŏng kum dêi mâu khu râ, kơvâ cheăng, tơring kong pơlê Dak Lak ƀă hiăng châ tơƀrê hên. Mâu pơkâ ‘na tơdâng tơ’mô pơla kơdrâi kơnốu pơrá ai mâu tơdroăng ki châ tơƀrê tâng pơchông ƀă hơnăm 2022, ki rơhêng vâ tối cho mâu pơkâ ‘na hnê hriâm hnê mơjiâng, hbrâ mơdât pâm xiăn tung rơpŏng.

Vi ƀan kong pơlê Dak Lak hiăng mơdêk pơtâng tối, hnê hriâm, tơbleăng troăng hơlâ dêi Đảng, troăng hơlâ, luât dêi Tơnêi têa ‘na mâu troăng hơlâ hdroâng kuăn ngo, Luât xon veăng ƀă rơpŏng, mâu tơdroăng ki tơdjâk dêi xo on veăng tá hâi tro hơnăm ƀă xo on veăng ối achê hdroâng hdrê; mơjiâng inâi khôi hmâ ‘na on veăng rơpŏng vâ xúa ăm kong pơlê; pêi pro tro pơkâ ‘na mơjiâng on veăng, tơlôi dêi pó, hnoăng dêi nôu pâ ƀă kuăn ‘nĕng  klêi kơ’nâi tơlôi.

Jâ Nguyễn Thị Kim Thúy, Kăn phŏ pơkuâ Vi ƀan Pơlê pơla dêi Kuô̆k hô̆i, Kăn pơkuâ khu séa ngăn mơnhên ƀă kheăn kơdeăn mâu tơdroăng châ tơƀrê ki kong pơlê Dak Lak châ tơƀrê, tơdrêng amê, pơkâ thế kong pơlê kal ai mâu troăng pêi ki nhên vâ pêi pro troăng hơlâ, luât ‘na tơdâng tơ’mô pơla kơdrâi kơnốu, Luât on veăng ƀă rơpŏng hngêi.