Khu tơrŭm pêi chiâk deăng xúa kŏng ngê̆ rơxông nếo Khu tơdjêp Farm xua ngoh Tô Linh Bình, 29 hơnăm pro Kăn hnê ngăn Hô̆i đong pơkuâ hlối cho Kăn pơkuâ tơdroăng cheăng ai tíu pêi cheăng a thôn 5, cheăm Hà Mòn, tơring Đăk Hà, kong pơlê Kon Tum. Laga khu tơrŭm cheăng ai tíu pêt mơjiâng tơmeăm a hên tíu tung kong pơlê, môi tiah Đăk Hà, Ngọc Hồi, Đăk Tô, Kon Braih, Sa Thầy, pơlê kong kơdrâm Kon Tum ƀă thăm nếo tá a kong pơlê pú hmâ a kong pơlê Gia Lai.

Vâ kơdroh iâ ki kơtăn ki hên iâ ‘na tơnêi tơníu, mơjiâng tơdroăng tơrŭm, tơdjêp krá tơniăn pơla khu mơngế pêi cheăng, mê ngoh Tô Linh Bình tối ăm ‘nâi, tâi tâng 30 ngế pơrá thế ‘nâi ki xiâm kối ‘na kŏng ngê̆ thong tin:

‘’Tơdroăng cheăng Kŏng ngê̆ thong tin djâ pơtroh pro ki tơ’lêi nhên ƀă ôh tá păng lôi tung tơdroăng pêi chiâk pêi deăng. Mâu vâi pú hmâ ối a hơngế tơdjêp ing Zalo, Facebook, klêi mê cho khu tơrŭm cheăng tiô mâu khu tung phôn râng kŏng, tung trang krê troăng hyôh. Mơjiâng trang fanpage cho vâ đi đo tơ’nôm ai mâu um, mâu tơdroăng chư chêh, video ‘na kơdrum vâ vâi krâ kuăn pơlê rơtế mot hnê hriâm dêi pó túa ki rơkê tơtro tiô chal rơxông nôkố’’.

Tiô ngoh Tô Linh Bình ăm ‘nâi, ngoh kô khŏm mơ-eăm tăng troh pêi chiâk deăng krúa lĕm ƀă kong prâi xua vâ tăng tơdroăng ki châ trâm dêi châ tơná, drêng xo on veăng mê rêh ối tung dế kơdrum loăng plâi xú pơkeăng nhâ loăng vâ rak vế hdrê kơchâi plâi pôm i krúa, dâi lĕm. Drêng hiăng ai troăng prôk ki nếo, ngoh tối tơbleăng ăm hên kuăn pơlê ki pêi chiâk deăng, mơjiâng môi troăng pêi chiâk deăng krúa lĕm vâ rak vế dêi châ tơná ƀă rak vế pơlê pơla.

Nôkố, 30 ngế ối tung Khu tơrŭm pêi chiâk deăng xúa kŏng ngê̆ rơxông nếo tơdjêp ing cheăng chiâk deăng Farm dế pêi pêt, rak ngăn lối 50 ha kơphế, lối 70 ha plâi sầu riêng rơtế ƀă chât ha loăng plâi kâ, pêi kơtăng khât pơkâ rak ngăn tiô troăng hưh cơ sinh hok, tơkéa vâ tối xúa ‘na phon hlá nhâ. Tối tơno ‘na kơdrum loăng plâi dêi rêm ngế Khu tơrŭm cheăng đi đo châ tơ’nôm tung khu. Drêng hlo ai mâu tơdroăng ki nếo, môi tiah pơreăng xông kâ ‘nhê, loăng plâi ôh tá xông dâi lĕm mâu khu tơrŭm cheăng pơrá châ tơdah tơdroăng hnê mơhno, teăm tŏng kum tơdrêng ing mâu ngế ki rơkê tung Khu tơrŭm cheăng.

Ngoh Lê Quốc Anh, hngêi ối a thôn 2, cheăm Đăk Ui, tơring Đăk Hà tối ăm ‘nâi, ki tơ’lêi má môi dêi mâu khu tơrŭm cheăng cho chiâng vâ tơdah tơdroăng tŏng kum ing hơngế ƀă mơhé drêng lâi kal xuân chiâng, xuân ai:

“Á pêt 2 ha plâi sầu riêng tơvât ƀă loăng plâi mít. Pêi tiô troăng sinh hok hlo ga tơniăn, thăm nếo lĕm ƀă kong prâi. Ing măng pơlê pơla ƀă ai khu cheăng krê dêi Khu tơrŭm cheăng nếo mê nhŏng o trâm mâ tơpui tơno dêi pó cho tơ’lêi hlâu. Drêng ai tơdroăng ki klâi mê nếo krếo ing (Fêis-thai) Facetime mê ngin tơpui tơno ing mê ga tơ’lêi. Kal drêng lâi mê pin krếo tung môi khu mê, mê drêng lâi nhŏng o xuân tâi hiâm mơno tŏng kum teăm tơdrêng’’.

Nôkố a mâu tơmeăm, môi tiah kơphế, plâi sầu riêng rơtế ƀă mâu khu loăng plâi kâ dêi Khu tơrŭm cheăng chiâk deăng Farm hiăng ôh tá ai tŭm tơdroăng kal vâ tung kơchơ tê mơdró.

Hiăng rơtế dêi pó tơkâ hluâ hneăng ki pá puât, mâu khu tơrŭm cheăng nôkố pơtối rơtế môi tuăn pêi pro tiô pơkâ, tơtro ƀă hnoăng cheăng ton xŏn tâ ăm mâu troăng pêi chiâk deăng hưh cơ ki krúa lĕm. A ngiâ Khu tơrŭm cheăng po rơdâ ƀăng deăng tôh têa ki chiâng tôh xêh, tơdrêng amê kĭ mah kơxô̆ kơpong pêt vâ tơmeăm kô chiâng troh hơngế. Rơtế a mê xúa kŏng ngê̆ tơ’nôm rĕng tung tơdroăng rak ngăn, séa ngăn dêi rêm kơdrum loăng plâi vâ mơngế rôe xúa tơ’lêi ti tăng xiâm kối, mơdêk ‘na dâi lĕm dêi rêm tơmeăm khoăng.

Tối ‘na mơngế ki ối a ko, djâ ăm Khu tơrŭm cheăng pêi chiâk deăng xúa kơmăi kơmok rơxông nếo Khu tơdjêp cheăng chiâk deăng Farm Tô Linh Bình, ngoh A Xây, Kăn phŏ hnê mơhno má môi tơdroăng cheăng Đảng kong pơlê Kon Tum tối ăm ‘nâi:

“Tung pêt mơjiâng tơmeăm pêi lo ing chiâk deăng krúa lĕm, lĕm kong prâi Tô Linh Bình ai hên troăng pêi, hên tơdroăng ki châ tơƀrê ƀă ki má lối cho tơdroăng veăng kum rơtế đoân viên droh rơtăm, mơjiâng tăng cheăng pêi ăm đoân viên droh rơtăm pá puât. Tung mâu hơnăm hiăng hluâ ngoh Bình xuân hiăng châ kâ pri hên’’.

Hơnăm 2022, ƀă Khu tơrŭm pêi chiâk deăng xúa kơmăi kơmok rơxông nếo dêi Khu tơdjêp cheăg chiâk deăng Farm tiô rơxông nếo ƀă châ tơƀrê, ngoh Tô Linh Bình châ tơdah tơdroăng phiu ro kân, moi tiah Pri Lương Định Của ăm kuăn pơlê pêi chiâk deăng hơnăm ối nếo – ngế tê mơdró pơxiâm tăng cheăng pêi chiâk deăng rơkê dêi lâp tơnêi têa. Xuân tung hơnăm 2022, ngoh Tô Linh Bình châ Vi ƀan hnê ngăn kong pơlê Kon Tum diâp ăm Ngiâ méa rơxông nếo ki rơkê kơhnâ dêi kong pơlê Kon Tum ‘na kơvâ cheăng pêi, pêt mơjiâng tơmeăm tê mơdró.