A cheăm Ia Chiă, tơring Ia Grai, kong pơlê Gia Lai, Khu xiâm hnê ngăn Đoân Droh rơtăm hiăng diâp 350 hnoăng tơmeăm ăm mâu rơpŏng cho kŏng nhân pêi cheăng ki trâm xahpá, vâi hdrêng cho kuăn ngo ki iâ mơngế kơdo mơ-eăm tung hriâm tâp ƀă hên hĕng mâu tơdroăng ki ê. Rêm hnoăng tơmeăm mê kơnâ 700 rơpâu liăn, tung mê ai liăn mâ ƀă mâu têa rơmâ, xi yâu, têa meăm, ƀôt ngot. Kơnôm ing Tơdroăng “Têt tŏng kum, hơnăm Prếo mơnhông”, Khu xiâm hnê ngăn Đoân Droh rơtăm pói rơhêng vâ pơtối mơnhông khôi túa ki tŏng kum dêi pó, “tơveăng, hơ-ui kum”, tơrŭm, tŏng kum tơmeăm khoăng tiô khôi hmâ dêi hdroâng kuăn ngo.

Rêm râ Đoân pơtối veăng pêi kơhnâ khât, ai hên tơdroăng cheăng ki tơƀrê, rơtế ƀă khu vâi droh rơtăm, vâi o phô̆m vâ xông kân ki ai tơdroăng rêh ối xahpá, ki málối tung roh Têt Lo hơnăm nếo, veăng kum mơjiâng chiâng ivá cheăng vâ mâu vâi pú droh rơtăm, đoân viên, mơngế pêi cheăng pơtối kodo mơ-eăm mơnhông tung pêi chiâk pêi deăng. Châ xo tơmeăm tŏng kum ing tơdroăng kố, ngoh Rơmah Ky, pơlê Kon Yô̆, cheăm Ia Chiă tối:

“Mơnê mâu kơ koan, mâu đông lêng hiăng châ ngăn ƀă hbru tơmeăm, mê cho tơdroăng ki ai pơxúa khât ƀă pơlê cheăm, pói rơhêng vâ tơdroăng tŏng kum hên tâ kơ mê nếo dêi rêm râ, rêm kơvâ cheăng troh a cheăm kơpong hơngế hơngo, kơpong ki malối kơtiê xahpá dêi tơring”.

Drêng kố, khu hnê ngăn dêi Khu xiâm ngăn Đoân Droh rơtăm Kŏng san Hồ Chí Minh rơtế ƀă Khu kăn hnê ngăn Đoân Droh rơtăm kong pơlê Gia Lai hiăng lăm pôu, mơhnhôk khu mô đô̆i gak tíu tơkăng kong a Đông gak ngăn tíu tơkăng kong Ia Chiă, kong pơlê Gia Lai.

Gia Lai cho tíu ki má 13 tung 25 kong pơlê, pơlê kong kân ki po Tơdroăng “Têt tŏng kum, Hơnăm Prếo Mơnhông” hiăng hbru kum tơmeăm châ lối 10 rơpâu 400 hnoăng tơmeăm Têt kum ăm mơngế kŏng nhân, mơngế pêi cheăng ki ai tơdjâk troh tơdroăng tro kơdroh liăn khế, klêi kơ’nâi to lâi hơnăm ki tro tâ tú pơreăng, mâu kuăn pơlê ki tơnăng ká xi xŏng trâm hên tơdroăng pơloăng mơnúa xua hyôh kong prâi hơ’lêh.

Xuân tung măng tĭng hdrối, Khu xiâm ngăn Đoân Droh rơtăm Kŏng san Hồ Chí Minh tơrŭm cheăng ƀă Khu hnê ngăn Đoân Droh rơtăm kong pơlê Kon Tum tơkŭm po Tơdroăng “Rơnó Hơngui tơkăng kong - Têt chuăn rơlố têa kơxĭ” drêng troh Têt Giáp Thìn 2024 a 2 tơring tíu tơkăng kong Ia HDrai ƀă Sa Thầy.

A tơring tíu tơkăng kong Ia HDrai, kong pơlê Kon Tum, Khu hnê mơhno tíu xiâm Đoân Droh rơtăm Kŏng san Hồ Chí Minh hiăng kum túa ki pêi cheăng kơnâ châ 2 rơtal iăn ing kơxô̆ liăn ki kơjo kum vâ đoân viên, droh rơtăm mơnhông pêi cheăng kâ; diâp 20 hnoăng liăn hriâm, rêm hnoăng kơnâ 2 rơtuh liăn ăm mâu vâi o hok tro kơtiê ki hriâm rơkê; diâp 30 hnoăng tơmeăm ăm kŏng nhân Kŏng ti pêi cheăng tiô rơnó, môi tung khu pêt loăng kơxu Chư Mo Rai ƀă Kŏng ti tơlo liăn cheăng Kơxu Sa Thầy. Ngoh Ngô Văn Cường, Kăn pơkuâ hnê ngăn xiâm Đoân Droh rơtăm, Kăn hnê ngăn Vi ƀan Séa ngăn tíu xiâm Đoân Droh rơtăm tối ăm ‘nâi:

“Kơnôm ing tơdroăng cheăng tŏng kum kố cho vâ kum ăm mơngế pêi cheăng, vâi droh rơtăm, mơngế kŏng nhân, mơngế ki ai tơdroăng rêh ối kơtiê xahpá cha ai liăn ngân, kế tơmeăm vâ prếo a pơlê kâ Têt châ phâi tơtô ƀă dêi rơpŏng hngêi hơniâp ro tâ. Klêi kơ’nâi Têt mê kô ai ivá mơ-eăm hên tâ vâ kum ăm mơngế pêi cheăng, mâu vâi droh rơtăm, kŏng nhân ki ai tơdroăng rêh ối kơtiê xahpá ai cheăng pêi tơniăn drêng vâ koh tơdah Têt hơnăm nếo”.

A Tơdroăng “Rơnó Hơngui tơkăng kong -Têt chuăn rơlố têa kơxĭ” hnối pêi pro adrêng ƀă tơdroăng hbru kum tơmeăm Têt ăm vâi droh rơtăm kŏng nhân, mơngế pêi cheăng châ tơkŭm po a cheăm Mô Rai, tơring Sa Thầy, Khu hnê mơhno Tíu xiâm ngăn Đoân Droh rơtăm Kŏng san Hồ Chí Minh hiăng diâp 20 hnoăng tơmeăm ăm mơngế ki ai tuăn mơno rơkê kơhnâ tung hdroâng kuăn ngo; hbru 2 toăng kơmăi vi tĭnh, loa ki djâ ukố umê ăm Đoân Droh rơtăm cheăm Mô Rai.

Drêng Têt tiô khôi hmâ dêi hdroâng mơngế hiăng vâ chê troh, Khu hnê mơhno cheăng xiâm Đoân Droh rơtăm Kŏng san Hồ Chí Minh rơtế ƀă Khu hnê ngăn Đoân Droh rơtăm kong pơlê Kon Tum xuân hiăng lăm pôu, rơkâu Têt mơhnhôk hiâm mơno, hbru tơmeăm ăm mâu kăn ƀô̆, mâu lêng Kŏng an cheăm  Ia Dom ƀă Đông gak tơkăng kong Ia Dom, tơring Ia HDrai.

Tơpui a roh po trâm mâ, Kăn pơkuâ hnê ngăn Đoân Droh rơtăm Ngô Văn Cương tối ăm ‘nâi “Rơnó Hơngui tơkăng kong - Têt chuăn rơlốu têa koxĭ” cho tơdroăng cheăng ki hmâ pêi pro hiăng châ Khu hnê mơhno xiâm Đoân Droh rơtăm tơkŭm po a mâu hâi vâ chê troh Têt Lo Hơnăm nếo. Tơdroăng kố cho vâ hnê mơhno, mơhnhôk, thăm modêk tuăn mơno ăm đoân viên, droh rơtăm ‘nâi hlê nhên ki kal dêi hnoăng cheăng gak tíu tơkăng kong tung mơnhông pêi cheăng kâ, rêh ối pơlê pơla, kring vế tơniăn tíu tơkăng kong dêi tơnêi têa; pơtối mơdêk hiâm tuăn tung tŏng kum, hơ-ui pâ dêi pó pơla đoân viên, droh rơtăm, mâu vâ o, vâi muăn phô̆m vâ xông kân, vâi krâ-nhŏng o ki ai tơdroăng rêh ối kơtiê xahpá tung roh Têt Lo hơnăm nếo. Ngoh Ngô Văn Cương xuân hiăng pâ thế Khu hnê mơhno ngăn Đoân Droh rơtăm kong pơlê Kon Tum hnê tối rêm râ Đoân dêi kong pơlê pơtối hnê mơhnhôk ‘na tơdroăg kố vâ mơhno tối, tơbleăng ăm mâu tơdroăng cheăng ki ai pơxúa păng ‘nâng tung mâu hâi mơ’nui hơnăm, hbrâ tơdah Têt.