Hâi lơ 17/01, a tíu pêi cheăng xiâm Đảng, Khu xiâm pơkuâ Đảng hneăng má XIII hiăng hôp séa ngăn ƀă tơpui ‘na tơdroăng pói vâ pơtê pôu râng hnoăng cheăng, pơtê pêi cheăng xua hơnăm hiăng krâ dêi pôa Nguyễn Xuân Phúc, Kăn cheăng tung Khu xiâm kal kí, Kăn cheăng tung Khu xiâm pơkuâ Đảng hneăng má XIII, Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, Kăn xiâm hnê ngăn Hô̆i đong cheăng lêng, gâk kring hneăng hơnăm 2021 – 2026. Drêng pôu râng hnoăng cheăng Ngế pro xiâm hnê ngăn Chin phuh hneăng hơnăm 2016 – 2021, pôa Nguyễn Xuân Phúc hiăng mơ-eăm hên tung pơkuâ, hnê mơhno, pơkuâ tơdroăng hbrâ, mơdât pơreăng COVID-19 châ tơƀrê kal khât.

Laga, pôa pôu râng hnoăng cheăng kal kí dêi ngế ối a ko drêng hên kăn ƀô̆, tung mê, ai 2 Ngế pro xiâm phŏ hnê ngăn tơnêi têa, 3 ngế xiâm pro xôi, xôi tung pêi cheăng, tơmiât, pro tro tơ’nhê hên ó; 2 Ngế pro xiâm phŏ hnê ngăn tơnêi têa hiăng pâ pơtê cheăng, 2 ngế xiâm ƀă hên kăn ƀô̆ tro pơxâu phâk xôi kân. Hlê plĕng nhên hnoăng a ngiâ Đảng ƀă Kuăn pơlê, pôa hiăng ai pro đơn pâ pơtê cheăng, pơtê tơdroăng pêi cheăng xua hơnăm hiăng krâ. Khu xiâm pơkuâ Đảng môi tuăn ăm pôa Nguyễn Xuân Phúc pơtê pêi cheăng, pơcháu Khu xiâm kal kí hnê mơhno mâu kơ koan ki tơdjâk pêi pro mâu mơ-éa tiô pơkâ.