Chi ƀô̆ thôn 10 A châ Đảng ƀô̆ cheăm Ea Kly, tơring Krông Pač, kong pơlê Dak Lak rah xo pro tíu mơjiâng túa cheăng ‘’Chi ƀô̆ 4 tơdroăng lĕm’’. Ing mê, Chi ƀô̆ thế pơkâ mâu tơdroăng pê  klêi hnoăng cheăng kal kí, pêi tơƀrê tơdroăng rêh ối, môi tuăn lĕm dêi rơpó, hnê tối pêi pro tro, đảng viên rak vế pêi pro tro. Vâ chiâng pêi tơdroăng mê, pôa Trần Ngọc Quang, Kăn hnê ngăn Chi ƀô̆ thôn 10 A ăm ‘nâi: Chi ủy hiăng ngăn a tơdroăng ki ai khât dêi cheăm ƀă ki rơdêi dêi tơrêm đảng viên tơkŭm hôp ƀă, môi tuăn pơcháu hnoăng cheăng ăm tơrêm ngế pêi. Kơ’nâi 3 khế tơbleăng, tơdroăng cheăng dêi Chi ƀô̆ hiăng pêi tro, tơrêm ngế đảng viên rế hlê plĕng, pơtối rak ki pơxúa dêi hnoăng cheăng pro kăn hnê ngăn mơnhông cheăng kâ rêh ối dêi tơrêm pơlê cheăm.

 ‘’Chi ƀô̆, râ ủy chi ƀô̆ tơkŭm hôp pơkâ thế pêt reăng péa pâ troăng pro lĕm pơlê, mơhnhôk krâ ‘măn camera xup ngăn a tíu ki xiâm. Pro ăm kuăn pơlê ai tuăn loi a chi ƀô̆ xuân hmiên tuăn, kuăn pơlê xuân kơhnâ pêi chiâk vâ mơdêk pê lo liăn, mơnhông tơdroăng rêh ối dêi kuăn pơlê tung pơlê cheăm’’.

Đảng ƀô̆ cheăm Ea Sin, tơring Krông Ƀuk, kong pơlê Dak Lak ai 13 chi ƀô̆ ƀă 150 ngế đảng viên. Kơ’nâi châ Đảng ƀô̆ tơring rah xo pêi mơnúa  pro túa pêi pro ahdrối “Chi ƀô̆ 4 tơdroăng lĕm ’’, Đảng ủy cheăm hiăng mơjiâng tơdroăng pơkâ, tơkŭm mơhnhôk, kĭ tơhrâ tơ’noăng mơjiâng ‘’Chi ƀô̆ 4 tơdroăng lĕm’’ a pơlê cheăm, mê cho: Chi ƀô̆ Lêng cheăng, Chi ƀô̆ ƀuôn Ea Káp, Chi ƀô̆ Nuô Ra Kring ƀă Chi ƀô̆ ƀuôn Ea Sin.

Vâ kơjo kum mâu chi ƀô̆ pêi tro tơdroăng cheăng, pôa Vũ Văn Tuấn, Kăn hnê ngăn Đảng ủy cheăm Ea Sin, tơring Krông Ƀuk, kong pơlê Dak Lak ăm ‘nâi: Tơdrêng ƀă xing xoăng hnoăng cheăng ăm rêm ngế tung râ ủy ki pơkuâ, hmâ ngăn, hnê mâu chi ƀô̆ tơbleăng mơnúa pêi mâu tơdroăng cheăng, Đảng ủy cheăm hiăng xúa phần mềm hlá mơ-éa ki chêh ‘na đảng viên troh tơrêm chi ƀô̆ vâ veăng mơnhông tơƀrê tơdroăng hôp hnê tối mâu tơdroăng cheăng:

“Đảng ƀô̆ cheăm Ea Sin hiăng tơbleăng phần mềm hlá mơ-éa chêh ‘na đảng viên vâ mơnhên tơdroăng cheăng pơ’lêh kơxô̆ tung mâu tơdroăng  mơjiâng Đảng tung tơdroăng tối tơbleăng, tối mơgêi  dêi Đảng ủy, rêm râ xuân châ tơbleăng troh tơrêm ngế đảng viên vâ séa ngăn, ‘nâi mâu tơdroăng ôh vâ đi đo mơdêk tơƀrê tơdroăng hôp tơpui hnê mơhno dêi chi ƀô̆ a pơlê cheăm tung mơjiâng chi ƀô̆ pêi 4 tơdroăng lĕm’’.

Sap mơnúa pêi “Chi ƀô̆ pêi 4 tơdroăng lĕm’’, 5/5 chi ƀô̆ châ rah xo mơnúa pêi pro a Đảng ƀô̆ tơring Krông Pač, kong pơlê Dak Lak hiăng pơ’lêh tơdroăng hnê mơhnhôk tơ’noăng ăm tơtro ƀă tơdroăng rêh ối nếo dêi pơlê cheăm, tíu pêi cheăng. Pôa Trần Quốc Vĩnh, kăn phŏ hnê ngăn Đảng tơring Krông Pač, kong pơlê Dak Lak tối tiah kố: Sap mâu tơdroăng cheăng kố hiăng pro xiâm mơhnhôk hên ngế vâ tơ’noăng tung tâi tâng Đảng ƀô̆ tơring, veăng mơnhông tơƀrê hnoăng pơkuâ hnê mơhno, ivá tơplâ dêi khu tơrŭm cheăng Đảng ƀă ki tơƀrê  dêi mâu ngế kăn ƀô̆, đảng viên.

“Hên chi ƀô̆ hiăng tối, mơjiâng pơkâ achê ƀă tơdroăng ki hlo ai khât a tíu pêi cheăng dêi pơlê cheăm. Má péa nếo, thế pơcháu tro hnoăng cheăng dêi rêm ngế đảng viên, malối cho ngế ối a ko djâ troăng ahdrối. Xua mê hnoăng cheăng ăm rêm ngế đảng viên thế nhên, achê ƀă tơdroăng ki hlo ai khât. Ing mê ki tơƀrê tung tơdroăng cheăng pêi tơkŭm hôp mê cho 4 tơdroăng ki kal ngin thế mơhnhôk pêi tro tiô pơkâ luât pơkâ, tŭm tâ’’.

Vâ tơdroăng mơhnhôk tơ’noăng mơjiâng “Chi ƀô̆ 4 tơdroăng ki lĕm’’ đảng ƀô̆ cheăm pêi tro 4 tơdroăng’’ châ pêi po rêm hâi, đi đo vâ hên ngế vâ pêi, ai pơxúa, mê Khu kăn pơkuâ hnê ngăn Đảng ƀô̆ kong pơlê Dak Lak hiăng tơkŭm po leh mơhnhôk tơ’noăng tung tâi tâng Đảng ƀô̆. 20 Đảng ƀô̆ dêi Khu kăn pơkuâ hnê ngăn Đảng ủy Dak Lak hiăng kĭ tơhrâ tơ’noăng mơjiâng “Chi ƀô̆ pêi 4 tơdroăng lĕm”, Đảng ƀô̆ cheăm pŭn tơdroăng lĕm”  pơla hơnăm 2023-2028. \

Sap nôkố, Khu pơkuâ hnê ngăn Đảng mâu tơring, pơlê kong krâm, pơlê kong kơdrâm ƀă mâu Đảng ủy râ kong pơlê mơjiâng pơkâ, tơkŭm chêh inâi tơ’noăng “Chi ƀô̆ pêi pŭn tơdroăng lĕm”. Rêm hơnăm ‘mâi rơnêu hriâm ƀă pơtối po rơdâ vâ hnê la ngiâ chiâng tơdroăng pơkâ pêi tơdjuôm dêi Chi ƀô̆, Đảng ƀô̆ pơlê cheăm. Pôa Y Ƀiêr Niê, Kăn phŏ hnê ngăn Đảng kong pơlê Dak Lak , ăm ‘nâi:

“Mơjiâng chi ƀô̆ 4 tơdroăng lĕm, Đảng ƀô̆ 4 tơdroăng lĕm kô bú nếo cho rôh apoăng laga xuân cho xiâm ki vâ ăm mâu chi ƀô̆, mâu Đảng ƀô̆ a pơlê cheăm ngăn nếo mâu tơdroăng cheăng pêi ki kal tung hơnăm 2024 ƀă mâu hơnăm pơtối’’.

Ing tơdroăng  tơƀrê  ki mơnuâ pêi “Chi ƀô̆ 4 tơdroăng ki lĕm, hên cheăm, tơring tung kong pơlê Dak Lak dế chôa po rơdâ troh tâi tâng Chi ƀô̆, Đảng ƀô̆. Kố châ ngăn cho troăng rơhlâ ki kal vâ pơ’lêh rơdêi tung tơdroăng mơdêk hnoăng cheăng pơkuâ, ivá tơplâ dêi khu tơrŭm cheăng  Đảng ƀă ki tơƀrê tung mơdêk ivá pơkuâ hnê mơhno tơplâ dêi khu tơrŭm cheăng Đảng a cheăm ƀă ki tơƀrê dêi mâu kăn ƀô̆, đảng viên ton nah dêi kong pơlê ai pơkâ tro tiô hnoăng cheăng nếo.