Tung 6 khế apoăng hơnăm kố, Tíu xiâm ngăn pơkeăng pơlât tơring Di Linh, kong pơlê Lâm Đồng hiăng tơdah xo lối 250 ngế hdrêng kơtong, tung mê lối tơdế kơxô̆ ngế vâi hdrêng tro tơklô̆m rơxế a troăng. Ƀok thái pơkeăng Lê Công Tuấn, Kăn phŏ pơkuâ Tíu xiâm khăm pơlât ăm ‘nâi, kơnôm ing tơdroăng tơrŭm dêi hên tíu pêi cheăng, mê tơdroăng ki tơklô̆m rơxế hlâ rong, malối cho klâk têa hiăng kơdroh.

“Tung hơnăm 2024 kố tơdroăng ki klâk têa, tơklô̆m kơtong rơxế a tơring Di Linh kơdroh tâ tâng pơchông ƀă mâu hơnăm hdrối, tơklô̆m rơxế a troăng prôk châ lối tơdế. Kơnôm ing tơdroăng tơrŭm lĕm tro ƀă hngêi trung, hnê tối vâi hdrêng kơdroh iâ kơto rơxế hon đa, kuăn pơlê ki chía niân tơmâng ngăn dêi mâu vâi kuăn ‘nĕng tâ mê mâu rôh ki tơklô̆m rơxế mâu tơdroăng ki klâk têa hiăng kơdroh tâng vâ pơchông ƀă mâu hơnăm hdrối”.

Ƀă tơnêi tơníu ôh tá tơniăn, hên têa kroăng, têa plông, hno, long têa, vâ hbrâ ví tơdroăng ki tro klâk têa, mâu tíu pêi cheăng, khu tơrŭm a tơring Di Linh hiăng tơbleăng tâp tơbleăng lối hrĭng to kơƀeăng tơbleăng a mâu long, rơchoâ têa; kơ’nêh ếo klê têa vâ tŏng xo mâu ngế klâk tê, loăng, kơxái ƀă hên ki ê a mâu long, rơchoâ. Hnê tối mơhnhôk kuăn pơlê hbrâ rơnáu kế ki tât a mâu long, rơchoâ ki kŭn dêi rơpŏng. Tiô jâ Ninh Thị Một, Tôh trương Tôh kơphô̆ 17, Pơlê kân Di Linh, tơring Di Linh, klêi pêi pro túa hbrâ ví klâk têa a hngêi.

“Klêi kơ’nâi hnê tối mê vâi krâ nhŏng o hiăng ‘no xêh liăn roê tơmeăm vâ pro kơxái đông tung long, vâ ai mâu troăng hbrâ ví, hbrâ mơdât klâk têa tiô tơdroăng hnê tối dêi Khu hnê mơhno hbrâ mơdât klâk têa a pơlê kân”.

Nâ Lưu Thị Thủy Chung, a tôh kơphô̆ 17, Pơlê kân Di Linh, tơring Di Linh, kong pơlê Lâm Đồng ăm ‘nâi, rơpŏng nâ ai chiâ môi to rơchoâ vâ tôh tơmeăm pêt trâu lối 10 met tung kơdrum hngêi. Vâ rak tơniăn, nâ hiăng kâng tât tâ tá klôh, pro péa mot vâ mơdât mơngế mot lo, ví tơdroăng ki trâm xía vâ.

“Klôh têa ki kố á chiâ vâ tôh ăm dêi mâu tơmeăm pêt, mê mâu vâi xăng peăng khu vâi kơdrâi troh hnê á kât đông ƀă kât kơtôu rơxế tâng ôh tá mơhúa ai kơbố klêh tung kố mê châ kơpon a kơxái mê ah krếo vâi lăm tŏng xo. Bă tâ tá klôh mê á ai kâng tât tâi tâng ƀă pro péa vâ ôh tá ăm ai kơbố mot lo tung kố rơ-iêo. Drêng lâi rơpŏng hngêi kal mê nếo po mot tung kố”.

Tơdroăng ki hnê klê ƀă hnê hriâm ki tơniăn tung têa ăm vâi hdrêng xuân châ tơring Di Linh tơmâng ngăn tơbleăng. Tung rơnó pơtê hriâm kố nah, hiăng ai lối chât to lâm hnê klê ăm vâi hdrêng châ po a mâu cheăm, pơlê kân. Tiô jâ Hà Thị Thùy Linh, Kăn hnê ngăn vâi kơdrâi tơring Di Linh, kong pơlê Lâm Đồng, cho ngế ki cheăng tung khu hnê mơhno, khu ngăn vâi kơdrâi rêm râ cho khu ki xiâm veăng hnê tối mơdêk ki rơkê plĕng túa ki hbrâ mơdât klâk têa a vâi hdrêng.

“Tơrŭm ƀă mâu kơvâ cheăng, rêm râ a tơring veăng tung mâu tơdroăng cheăng hnê tối a mâu cheăm pơlê, vâ po lâm hnê hriâm klê têa ăm mâu vâi o, vâi kơdrâi tung lâp tơring. Ing mê vâ mơdêk ki rơkê plĕng, ăm vâi kơdrâi ƀă vâi hdrêng, veăng gum rak vế tơniăn tung tơdroăng rêh ối tơniăn, rơdêi. Pro tơ’lêi hlâu ăm vâi hdrêng ai tíu vâ mơnhông tŭm têk”.

Mâu lâm hnê klê têa châ po hiăng gum vâi o ‘nâi mâu tơdroăng ki rak vế tơniăn ăm dêi tơná tung mâu tíu ki ai long, rơchoâ têa xuân môi tiah hriâm pât ivá ƀă ai mâu tơdroăng xah hêi hơniâp ro, pơxúa tung rơnó pơtê hriâm. O Nguyễn Thiên Di, 13 hơnăm a cheăm Liên Đầm, tơring Di Linh, kong pơlê Lâm Đồng, tối:

“Á hriâm klê hiăng châ 2 măng tĭng. Châ mâu thái hnê klê. Tung rơnó pơtê hriâm á hriâm klê vâ hbrâ ví tơdroăng klâk têa ƀă mơdêk ivá ăm dêi tơná”.

O Trịnh Ngọc Bảo Châu, 12 hơnăm, rơtế ối a cheăm Liên Đầm ăm ‘nâi:

“Á hriâm mâu tơdroăng klê têa mê vâ tâng pơtih klêh tung klôh, tung têa kroăng, tung têa plông lơ mâu tíu ki long rơchoâ trâu á kơtú dêi chêng oh tá troh mê á kô xúa mâu tơdroăng ki á hiăng châ hriâm vâ klê troh a kĭng”.

Ƀă tơdroăng ki veăng gum dêi khu kăn pơkuâ ƀă mâu khu tơrŭm khu râ, tơdroăng ki xâu xía a vâi hdrêng a tơring Di Linh hiăng hlo hơ’lêh khât, pro tơ’lêi hlâu ăm mâu vâi o châ ro xah, mơnhông ivá rơdêi, tơniăn.