Kong tô ó  ton hâi môi tiah kố dế pro hrĭng rơpâu ha kong a tâi tâng 10 tơring, pơlê kong kơdrâm kong pơlê Kon Tum dế rơ-iô ‘nâng tơ’lêi tro on chếo. Mâu ngế pơkuâ rak kong hiăng hbrâ tơ’nôm mâu ngế veăng gak ngăn kong. Pôa Ngô Tùng Khoa, Kăn phŏ pơkuâ Kŏng ti pêi cheăng tiô rơnó Môi tung khu rak ngăn kong dêi tơring Ngọc Hồi, tíu rak ngăn lối 23.400 ha kong, ăm ‘nâi, tơdroăng hbrâ mơdât on chếo kong dế châ mâu tíu pêi cheăng pêi ahdrối. Hbrâ rơnáu xâu on chếo, mâu tíu pêi cheăng pơkuâ rak kong a Kon Tum dế trâm pá “ôh tá ai têa”, hên tơdroăng xơpá.

Tơnêi kong kân la mơngế gak ngăn kong bu iâ; tơmeăm vâ hbrâ mơdât on chếo ôh tá ai. Tơdroăng séa ngăn mơngế mot lo tung kong xuân môi tiah tí tăng ngăn tơdroăng vâi xúa on xuân vâ kơdroh hên ƀăng kong ki achê troăng kân, chiâk deăng dêi kuăn pơlê.