*** Sap ing apoăng hơnăm, Khu râ kăn pêi cheăng dêi Khu xiâm tơnêi têa xua jâ Bùi Thị Minh Hòa, Kăn xiâm pơkuâ hnê ngăn cheăng Đảng tơnêi têa, Kăn xiâm pơkuâ pơtâng tối mơhnhôk kuăn pơlê Tơnêi têa pơkuâ djâ hiăng troh lăm pôu ƀă diâp kơxuô tơmeăm kŏng nhân pêi cheăng tung kong pơlê Dak Lak. Jâ Bùi Thị Minh Hoài tối nhên, Dak Lak cho kong pơlê tíu xiâm kơpong Tây Nguyên, mâu khu tê mơdró tung kong pơlê ki hên cho khu tê mơdró krâ kơvâ ƀă kŭn, tơdroăng rêh ối dêi khu kŏng nhân pêi cheăng ngăn tơdjuôm ối trâm hên pá puât.

Xua mê, tơdroăng rak ngăn ăm mơngế pêi cheăng cho hnoăng cheăng ki kal dêi mâu khu râ, mâu kơvâ cheăng. Jâ Bùi Thị Minh Hoài pơkâ thế, tung la ngiâ, mâu khu râ kăn pơkuâ dêi Dak Lak kal pơkâ mâu troăng pêi ki kal, châ tơƀrê vâ pêi pro lĕm tro tâ nếo tơdroăng tŏng kum tơdroăng rêh ối ăm mơngế pêi cheăng, tơniăn tơdroăng rêh ối pơlê pơla, kơdroh kơtiê krá tơniăn.

“Á pơkâ thế mâu khu râ kăn pơkuâ hnê ngăn Đảng, khu râ kăn pơkuâ, liên đoân pêi cheăng rơtế mâu khu râ đi đo ‘nâi tơdroăng ‘na tơdroăng rêh ối, tơdroăng pói vâ  dêi mơngế pêi cheăng vâ ai troăng tŏng kum teăm tơdrêng vâ tơniăn ăm kŏng nhân mơngế pêi cheăng châ pơxúa mâu troăng hơlâ tŏng kum dêi Đảng ƀă tơnêi têa. Ki rơhêng vâ tối tơmâng troh tơdroăng cheăng pêi, liăn khế luât pêi cheăng, pêi pro pơkâ kuăn pơlê pơkuâ dêi hnoăng cheăng, tŏng kum kế tơmeăm khoăng, hiâm mơno ăm mơngế pêi cheăng păng ‘nâng rŭm ƀă khu tơrŭm cheăng kŏng đoân Việt Nam’’.

*** Pơxúa kal tŏng kum đoân viên kong đoân, malối cho mâu đoân viên ki ai tơdroăng cheăng kâ xơpá, tro châi tamo ki ôh tá kâi pơlât prêi, xía vâ tung pêi cheăng, tung pơla hdrối kố, Khu ngăn mâu ngế pêi cheăng rêm râ a kong pơlê Dak Lak hiăng ai hên rôh pôu kơ-êng, mơhnhôk, diâp tơmeăm. Malối, cho tơdroăng hngêi ối Hơtôu kong đoân hiăng châ tơbleăng bro tơdâng tơ’mô, châ xo tơdroăng ki môi tuăn dêi rêm râ Đảng, kăn pơkuâ, khu râ, kơvâ cheăng, rêm râ, cheăm, tơring, đoân viên, ngế pêi cheăng.

Tiah mê, tung 5 hơnăm hdrối, kong pơlê hiăng mơhnhôk châ lối 23 rơtal liăn ƀă tơbleăng tŏng kum liăn bro, rơnêu vâ chê 600 toăng hngêi Hơtôu kong đoqân pơcháu ăm đoân viên ki ai tơdroăng rêh ối xơpá ‘na hngêi ối. Rêm toăng châ pơchái ôh ti xê mơhno hiâm mơno, tŏng kum dêi khu kăn pơkuâ Kong đoân mê ối veăng pêi pro troăng hơlâ tŏng kum rêh ối pơlê  pơla dêi kong pơlê.

Cho môi tung mâu ngế đoân viên châ kum bro ăm hngêi ối tung hơnăm 2023, nâ H’Phúc Niê, kong nhân Tíu pêi cheăng a Nông trường 19/8, kŏng ti tơlo liăn cheăng cao su Dak Lak, hiăng châ pêi bro ăm hngêi ki lĕm ăm rơpŏng. Tiah mê, a mơ’nui hơnăm 2023 nâ châ kum 40 rơtuh liăn ing Kong đoân Kong ti vâ bro hngêi Hơtôu kong đoân. Rơpŏng nâ hiăng veăng tơlo liăn, mung tơ’nôm bro hngêi dâng 45 met karê a  tơnêi ki nôu pâ xoăng ăm, ƀă tâi tâng kơxô̆ liăn cho vâ chê 10 rơtuh. Tung toăng hngêi malauâ gá kŭn la hơtôu, nâ H’Phúc phiu ro tối:

“Á phiu ro xua châ tơdroăng ki tơmâng ngăn dêi kong đoân kŏng ti,hiăng kum ăm rơpŏng châ bro hngêi ki kố, kum on veăng má hmiân tuăn tâ ‘na hngêi ối. Ing nôkố kơnốu á rế hía mơ-eăm pêi cheăng tâ nếo, pleăng hên tâ nếo hnoăng cheăng ăm kŏng ti’’.

*** Jâ Vũ Thị Hà Hà, Kăn phŏ hnê ngăn Vi ƀan pơlê kong kân Hà Nội tối nhên: Pơlê kong kân Hà Nội đi đo mơnhên mâu tơdroăng tơniăn tung pêi cheăng cho tơdroăng cheăng pêi ki đi đo. Mâu tơdroăng pêi mơhnhôk khế pêi pro tơdroăng rak tơniăn pêi cheăng hiăng châ pêi pro tơdâng tơ’mô ing pơlê kong kân troh mâu khu râ, kum kal khât tung mơnhông cheăng kâ ƀă tơniăn tŏng kum pơlê pơla dêi pơlê kong xiâm. Tối khât, pa kĭng mâu tơdroăng châ tơƀrê tung pơlê kong kân xuân ối ai mâu khu tê mơdró tơmeăm mơjiâng tá hâi tơmâng troh hên tơdroăng pêi cheăng rak tơniăn tung pêi cheăng, ai tơdroăng tung hơnăm 2023 tung pơlê kong kân xuân ối ai 296 roh trâm xía vâ pêi cheăng pro 300 ngế trâm xía vâ.

Xua mê, jâ Vũ Thị Hà pơkâ thế mâu Khu cheăng, kơvâ cheăng, pơlê kong kân, khu râ kăn pơkuâ, kŏng đoân mâu râ, ki rơhêng vâ tối cho mâu khu tê mơdró, tíu pêi cheăng mơjiâng tơmeăm tê mơdró, kŏng nhân, mơngế pêi cheăng kal tơkŭm po mâu tơdroăng chuyên đê ‘na rak tơniăn pêi cheăng ƀă tơdroăng pơlê pơla veăng amê ai khu tê mơdró, mơngế pêi cheăng, tơkŭm po mâu tơdroăng hnê mơhno tŏng kum khu tê mơdró, pro tơniăn mơngế pêi cheăng ăm mơngế pêi cheăng:

“Pêi pro tơdroăng lăm ngăn, séa ngăn tơdroăng rak tơniăn pêi cheăng, krúa lĕm tung pêi cheăng, hbrâ, mơdât chếo pơtôu a tíu cheăng, khu tê mơdró, khu tơrŭm cheăng mơgêi pơtân, mơgêi, mơnhên, xo vế túa ki rơkê tơtro tung tơdroăng hnê mơhno khế tơniăn pêi cheăng, tơbleăng Vi ƀan pơlê kong kân tiô pơkâ, pơkâ thế mâu tíu cheăng, khu tê mơdró, mâu khu mơjiâng pro tơmeăm, tê mơdró ối tung khu cheăng kâ tung pơlê kong kân hbrâ mơjiâng, tơbleăng pơkâ pêi thăm tơrŭm pêi pro ƀă tơdroăng ki ê, pro tơniăn pêi cheăng, rak ngăn ivá, mơdêk tơdroăng rêh ối kế tơmeăm khoăng, hiâm mơno ăm kŏng nhân, mơngế pêi cheăng.

*** Ngoh Trần Trung Hiếu, pơlê xiâm a kong pơlê Quảng Bình, cho ngế ki pơkuâ ngăn mâu ngế cheăng ƀă kơmăi kơmok ăm Kŏng ti pêi cheăng tiô rơnó Grup pơkuâ Sơn Hải, dế xo pêi tơdroăng cheăng bro krâ kế ki kơxô̆ 3, Tơdroăng tơkêa troăng kân Khánh Hòa – Ƀuôn Ma Thuột. Ngoh tối, a tơdroăng cheăng kố Grup Sơn Hải xing xoăng vâ chê 50 toăng rơxế kơmăi kơmok mê cho: Rơxế kơtâk, rơxế kui tơnêi, rơxế gu tơnêi, rơxế ƀen, mâu kế ki pong ƀă hên ki ê ƀă dâng 150 ngế kong nhân, xoăng pêi cheăng hên xôh tung pơla hâi măng.

Rêm ngế ki vê rơxế lơ kih sư pơrá châ Grup pơkuâ mơhá liăn ing 25 – 30 rơtuh liăn tung môi khế; ƀă mâu ngế pêi cheăng ki meăn bro, hâng pơklĕp meăm, pong trum, ƀă hên cheăng ki ê cho ing 12 – 17 rơtuh liăn môi khế tung môi ngế. Pakĭng liăn khế, ngế pêi cheăng ối châ xo liăn ăm tơ’nôm ki pêi tơ’nôm chôu, pêi cheăng a mâu hâi pơtê Leh.

Drêng rôh leh 30/4 kố, kăn pơkuâ grup pơkuâ hiăng kĭ kơlo liăn ăm tơ’nôm ăm rêm ngế cheăng cho 500 rơpâu liăn, tâng pêi cheăng hâi pơtê leh kô châ kâ kơlo liăn cho 300% tâng pơchông ƀă rêm hâi tâng pêi a kong hâi ƀă 330% pêi a kong măng. Kố cho kơlo ki riân tiô Luât pêi cheăng nôkố. Ngoh Trần Trung Hiếu ăm ‘nâi:

“Tơdroăng rêh ối dêi kong nhân ngin kố mê châ kong ti kum ăm tâi rak tơniăn khât. ‘Na ôu kâ mê kế kâ tơmeăm ôu krúa, ai tŭm trếo lĕm, koi tŭm chôu mê ai tíu koi krê ƀă ai krâ ‘măn kơmăi mơ’no hyôh hngíu. Tơdroăng rêh ối rak vế tơniăn ăm nhŏng o ngin pêi cheăng kơhnâ, rak vế tơdroăng ki pro tơtơdroăng tơkêa kố pro troăng kân kố’’.

*** Hneăng pơtê Leh 30/4 ƀă 1/5 hơnăm kố ton 5 hâi djâ tơdroăng ki phiu ro ăm hên ngế pêi cheăng laga pro hên khu tê mơdró, ki rơhêng vâ tối cho khu tê mơdró mơjiâng pro kế tơmeăm khoăng trâm hên pá puât. Hên tíu cheăng ƀeăn ƀĕng ăm mơngế pêi cheăng mơdêk kâ pêi cheăng, tơ’nôm hâi khế pêi cheăng klêi kơ’nâi leh, tíu ai kŏng nhân vâ xêh pêi cheăng tung mâu hâi pơtê leh vâ tơniăn tơdroăng pơcháu tơmeă.

Ƀă a Bình Dương, tíu ai kơdrâm mơngế pêi cheăng, jâ Phan Lê Diễm Trang, Kăn phŏ hnê ngăn Khu tơrŭm cheăng pơchoh chêp hmân ếo Bình Dương tối: 60 khu tê mơdró ối tung khu ƀă chât ngế kŏng nhân dế trâm pá puât tung tơdroăng rah mơjiâng xua hâi khế pơtê kơdrâ môi xôh. Jâ Trang tối ăm ‘nâi, tâng pơchông ƀă hơnăm 2023, hơnăm kố, đơn tơmeăm vêh hên xua mê khu tê mơdró hiăng pơkâ pêi mơjiâng pro kế tơmeăm khoăng plâ hơnăm. Tơdroăng pơtê leh ôh tá châ kĭ tơkêa ƀă khu tơrŭm cheăng iâ hâi, pơkâ thế pơcháu tơmeăm tro hâi khế xua mê drêng tơdah châ tối tơbleăng pơtê leh, khu tê mơdró thế tơpui ƀă mâu khu ki kok hâi pơcháu tơmeăm. Hên tơmối ôh tá môi tuăn xua mê pơkâ thế mơdêk ka pêi cheăng, lơ pơhlêh hâi pơtê ki ê ăm kŏng nhân vâ vâi hmiân tuăn, phiu ro pêi cheăng. Jâ Trang pâ thế:

“Tơdroăng ăm mơngế pêi cheăng pơtê ton hâi cho tro lĕm, laga thế ai tơdroăng ki rah pro hdrối. Pơtih hơnăm kố tơnêi têa tối ăm ăm pơtê ton hâi xua mê ai pơkâ hdrối 6 khế. Ôh tá chiâng bu tối tơbleăng môi pơla iâ klêi mê tối vâ mơhnhôk tơdroăng ôm hyô ƀă ăm mơngế pêi cheăng châ pơtê. Tiah mê, mâu ngế pêi hngêi kơmăi mơjiâng pro tơmeăm khoăng môi tiah ngin kố ôh tá teăm. Tung môi pơla iâ, ngin hiăng rah pro klêi mê pơtối ai roh pơtê ton hâi môi tiah kố mê cho môi tơdroăng pá puât kân ăm tíu mơjiâng pro kế tơmeăm khoăng, ôh tá xê to tung kơvâ pơchoh chêp hmân ếo mê ối tung mâu kơvâ pêt mơjiâng tơmeăm ki ê xúa hên mơngế pêi cheăng”.