Cheăm Đăk Nhoong, tơring Đăk Glei, kong pơlê Kon Tum ai troăng tơkăng kong tơnêi têa xŏn lối 35 km tơkăng ƀă tơring Đăk Chưng, kong pơlê Sekong, kong têa Lếo. Ƀă hiâm mơno “Rêm ngế kuăn pơlê cho môi tơneăn rêh”, hơnăm hiăng hluâ Đông mô đô̆i gâk tơkăng kong Đăk Nhoong tơrŭm krá tơniăn ƀă khu râ kăn pơkuâ cheăm Đăk Nhoong pêi pro lĕm tro Pơkâ kơxô̆ 01 dêi Ngế pro xiâm hnê ngăn Chin phuh ‘na tơkŭm po tơdroăng tâi tâng kuăn pơlê veăng gâk kring hnoăng pơkuâ tơnêi tơníu, gâk kring tơkăng kong tơnêi têa tung rơxông nếo.

Đăi tă Phạm Cảnh Toàn, Kăn phŏ pơkuâ tơdroăng kal kí Mô đô̆i gâk tơkăng kong kong pơlê Kon Tum tối ăm ‘nâi, Đăk Nhoong cho cheăm apoăng tung tâi tâng 13 cheăm tơkăng kong dêi kong pơlê Kon Tum tơkŭm po hâi leh. Kố cho tơdroăng ki kơnâ kal kí, rơkê trâu hơngế, cho roh vâ kăn ƀô̆, mâu lêng gâk tơkăng kong pâ mơnê troh khu râ kăn pơkuâ hnê ngăn cheăng Đảng, khu râ kăn  pơkuâ ƀă kuăn pơlê kong pơlê.