Kon Tum hlo ai kong mêi ôh tá tro rơnó kơdroh ki tô téa ó
Thứ ba, 13:59, 26/03/2024
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV4.Xơ Đăng - Kơxê măng hâi lơ 25/3, hên kơpong a 8/10 tơring, pơlê kong kơdrâm dêi kong pơlê Kon Tum ai kong mêi. Kố cho kong mêi ôh tá tro rơnó pơla rôh kong tô ó .
Mâu cheăm, tơring dêi kong pơlê Kon Tum peăng kơxê ƀă kơmăng ai mêi, mê cho: Đăk Glei, Ngọc Hồi, Tu Mrông, Đăk Tô, Sa Thầy, Đăk Hà, Kon Rẫy, pơlê kong kơdrâm Kon Tum. Pôa Nguyễn Văn Huy, Ngế pơtâng tối ‘na hyôh kong prâi Kon Tum ăm ‘nâi, têa mêi a mâu tơring ki hên sap 5-15mm. Kố cho rôh kong mêi ôh tá tro rơnó, cho kơnía khât kum kơdroh tô pơ-oh.
Hdrối mê, hâi lơ 24/3, a 2 tơring Kon Plông ƀă Đăk Glei xuân ai kong mêi. Laga, kố cho rôh kong mêi ôh tá tro rơnó. Tơmâng xo dêi Tíu ngăn hyôh kong prâi Kon Tum ăm ‘nâi, rôh kong mêi ôh tá tro rơnó kố tung kong pơlê Kon Tum hrá troh tâng vâ pơchông ƀă rêm hơnăm hdrối dâng môi khế ƀă rơnó mêi hơnăm 2024 tối xuân hrá mêi.
Viết bình luận