VOV4.Xơ Đăng - Klêi 14 hơnăm tơbleăng pêi pro, xua hên tơdroăng ‘noăng kĭng hbrâ mơdât tơhnah kĭng kroăng Pô Kô, kĭng ‘noăng peăng mâ hâi Lo, tíu ki tơkâ luâ pơlê kân Đăk Glei, tơring Đăk Glei, kong pơlê Kon Tum xŏn vâ chê 2km troh nôkố xuân ối ai mâu tơdroăng ki tá hâi bro klêi kal châ rĕng rơnêu hdrối kong mê khía mơhot têa kân lân lu troh. ‘Noăng ki hbrâ mơdât tơhnah kroăng Pô Kô, tíu ki tơkâ luâ pơlê kân Đăk Glei, tơring Đăk Glei, kong pơlê Kon Tum xŏn vâ chê 2km, tâi tâng liăn bro lối 93 rơtal.

Klêi kơ’nâi 5 hơnăm pro troh hơnăm 2013 ‘noăng ki kố tro pơtê bro xua kơxô̆ liăn ‘no bro lối 25 rơtal. Troh hơnăm 2019 ‘noăng kĭng kố nếo châ Vi ƀan hnê ngăn kong pơlê Kon Tum pơtối xoăng liăn vâ bro mâu tíu ki kal tá hâi bro klêi ƀă ki kơnâ tiô tối hdrối vâ chê 12 rơtal liăn.

Hâi lơ 16/12/2021 ‘noăng ki hbrâ mơdât tơhnah kroăng Pô Kô, tíu ki tơkâ luâ pơlê kân Đăk Glei, tơring Đăk Glei hiăng klêi tơdroăng ki krâ ‘măn mâu kế tơmeăm ki kal, la troh nôkố ‘noăng ki kố xuân tá hâi châ pơcháu ăm xúa ƀă hiăng tơ’nhiê.