Klêi kơ’nâi mâu troăng pêi hiăng po rơdâ pêi pro vâ mơdât tơdroăng châ lo pa kong kế tơmeăm khoăng ƀă ôh tá châ xo hnoăng liăn tiô kơlo pơkâ ing tơdroăng hrik xo, tê mơdró prê a têa kroăng, nếo achê kố Vi ƀan kong pơlê Kon Tum ai mơ-éa pơkâ khu, kơvâ cheăng, khu râ kăn pơkuâ mâu tơring tung kong pơlê thăm pơkuâ plong tik ai krâ kơmăi, kơmăi ki hrik prê.

Vâ mơdât tơdroăng ki ôh tá châ xo hnoăng liăn tiô kơlo pơkâ ing tơdroăng hrik xo prê, tê mơdró prê tung têa kroăng, Vi ƀan kong pơlê Kon Tum xuân hiăng pơkâ Kơ koan xiâm xo hnoăng mơhá kong pơlê thăm séa ngăn tơdroăng pêi tiô luât ‘na hnoăng mơhá, mơ-éa đơn ƀă tơdroăng chêh, pêi pro hnoăng cheăng ƀă liăn ngân tơnêi têa dêi khu tơrŭm cheăng, ngế krê ai tơdroăng hrik xo prê; pơxâu phâk kơtăng mâu ngế ki pro xôi luât ‘na hnoăng mơhá, kơxô̆ liăn ƀă mơ-éa đơn tiô tro pơkâ dêi luât; teăm tơdrêng châ hlo, pơxâu phâk kơtăng mâu tíu ki tối tơbleăng, chêh tối ôh tá tơdrăng.