Hâi hnê tối pêi pro tiô Chôu Plâi tơnêi hơnăm 2023 ăm Khu kăn dêi Kŏng ti ngăn On tơhrik Kon Tum tơkŭm po tơ’mot hên ngế veăng ai lối 90 ngế vâi o hok tro Hngêi trung râ má môi, râ má péa Đak Bla, pơlê kong kơdrâm Kon Tum. Tiô tơviah a kố tâi tâng mâu tơdroăng kơ-êng tung tơdroăng pơto pơtih rah ro ai mơhá tơdjâk troh tơdroăng ‘na kơdĭng on tơhrik, môi tiah: xúa on tơhrik ‘nâi kơdĭng tung lâm hriâm, rơpŏng hngêi; ‘nâi kơnó ki phá dêi  dêi tơmeăm ‘nhê hên on tơhrik; rah xo tơdroăng xúa tơmeăm ‘nâi kơdĭng on tơhrik... mâu vâi o hok tro tiâ tro hlối ƀă hlối nhên môi tiah hiăng rơbot ƀai.

O Chu Thị Thanh Huyền, hok tro lâp 9D, ăm ‘nâi:

“Klêi tơdroăng kố á hiăng hlê hên tâ ‘na ki pơxúa dêi chôu plâi tơnêi vâ kơdĭng on tơhrik rak vế hyôh kong prâi pôi tá pơ’lêh hyôh kong prâi. Á ai mâu tơdroăng pêi pro vâ kơdĭng on tơhrik  pơtih môi tiah a hngêi trung lơ a hngêi mê mâu tơmeăm ki xúa on tơhrik drêng ôh tá xúa, môi tiah drêng lo ing veăng lơ lo pa kong thế tơpâ on tơhrik, tơpâ ki pê rơxôh, tơpâ tơvi”.

Á púi vâ mâu tơdroăng pêi pro ki kŭn mê kô veăng kum tơdroăng rak vế hyôh kong prâi va pôi tá pơ’lêh hyôh kong prâi’’.

Ƀă hnoăng cheăng xiâm, kơvâ ngăn on tơhrik Kon Tum hiăng ai hên tơdroăng hnê tối, mơhnhôk vâ chê ƀă kuăn pơlê. Hơnăm kố ‘nâi nhên mâu ki vâ hnê tối châ mâu vâi o hok tro, tíu pêi cheăng tơrŭm ƀă hngêi trung tơkŭm po mâu hâi tơkŭm pá kong hâi hriâm ăm vâi o. Tơdrêng amê, cho hnê ƀă pa-nô, ap-phích, ƀăng rôl... ƀă tung Web, măng xah hô̆i, trang fanpage. Ƀơrô Tê mơdró Kŏng ti tơrŭm ƀă Đoân Droh rơtăm tơkŭm pêi  tiô tơdroăng “Rơtế ƀă o troh hngêi trung” tơkŭm hnê mơhnhôk pêi pro Chôu Plâi tơnêi hơnăm 2023.

Rêm tơdroăng pêi pro tung Tơdroăng mê xuân troh lâp lu tơdroăng hnê ‘’Kơdĭng on tơhrik - Chiâng tơdroăng hmâ pro”. Pôa Nguyễn Quang Hùng, Kăn xiâm phŏ Kŏng ti ngăn On tơhrik Kon Tum ăm ‘nâi, tíu pêi cheăng púi vâ tơbleăng troh lâp lu ki kal dêi tơdroăng pêi pro “Kơdĭng on tơhrik- chiâng tơdroăng hmâ pro” troh vâ chê tâ tung kuăn pơlê, malối cho mâu vâi o hok tro.

Sap ing mê, tơbleăng tơdroăng hnê tối mê troh rơpŏng hngêi, pú hmâ, nhŏng o xiâm ƀă thăm nếo tơbleăng ăm tâi tâng rêm ngế tung pơlê pơla. Ing mâu tơdroăng pêi pro hnê tối mê, hiăng hlo pơ’lêh khât ki hlê plĕng xuân môi tiah pêi pro dêi kuăn pơlê ‘na xúa on tơhrik ‘nâi kơdĭng vâ kring vế rak vế hyôh kong prâi hơ’lêh:

“Hnê tối ‘nâi kơdĭng on tơhrik xuân môi tiah pêi pro mâu tơdroăng Chôu Plâi tơnêi cho tơdroăng pêi pro đi đo. Kŏng ti ngăn On tơhrik Kon Tum tí tăng ‘nâi plĕng mâu tơdroăng pêi pro tơ’lêi vâ rĕng ăm kuăn pơlê hlê, ai hên tơdroăng pêi pro pơrá phá a rêm kơpong. Mâu rơpŏng kuăn pơlê xuân môi tiah mâu khu mơdró nôkố xuân tơkŭm a tơdroăng pêi pro kơdĭng on tơhrik  vâ mơdêk tơ ƀrê tơdroăng cheăng dêi Khu mơdró. Ƀă mâu rơpŏng hngêi kơlo ki hlê ƀă ‘nâi kơdĭng on tơhrik xuân hiăng hlo tơƀrê’’.

Ing tơdroăng mơhnhôk pêi pro Chôu Plâi tơnêi hơnăm 2023, on tơhrik ki châ kơdĭng dêi kong pơlê Kon Tum ai 2.400 kWh. Tơdroăng kố mơhno hiăng tơbleăng rơdêi troh lâp lu mâu tơdroăng mơhnhôk pêi pro Chôu Plâi tơnêi hơnăm 2023. Ƀă tơdroăng ki hâk mơnê cho hiăng ‘nâi kơdĭng on tơhrik ôh tá xê to a pơla môi chôu a kơmăng hâi tơdrốu, măng tĭng mơ’nui khế 3 rêm hơnăm po tung rôh mơhnhôk pêi pro Chôu Plâi tơnêi, mê hiăng chiâng tơdroăng hmâ pêi pro rêm hâi.