Kơxo lơ 17/4, a pơlê kong kơdrâm Kon Tum, Vi ƀan kong pơlê Kon Tum tơkŭm po Tơdroăng Kơphế Khu tê mơdró – Ngế tê mơdró vâ pơtối tơdah rơkong tơpui tối, pâ thế ‘na mâu tơdroăng pá puât, tơvâ tơvân dêi khu tê mơdró, ngế tê mơdró tung tơdroăng pêi cheăng mơ’no liăn cheăng ƀă mơjiâng tơmeăm tê mơdró a pơlê.

A tơdroăng kố, kăn teăng mâ mâu khu tê mơdró, ngế tê mơdró hiăng tơdrăng tơpui tơno ƀă khu râ kăn pơkuâ Vi ƀan kuăn pơlê ƀă mâu khu, kơvâ cheăng dêi kong pơlê Kon Tum ‘na mâu tơdroăng pá puât, tơvâ tơvân tung tơdroăng mơ’no liăn cheăng xuân môi tiah pêt mơjiâng tê mơdró a pơlê.

Pơtối tơmâng xo mâu rơkong tơpui tối, pâ thế, Vi ƀan kong pơlê Kon Tum, mâu khu râ, kơvâ cheăng ƀă khu râ kăn pơkuâ 10 tơring, pơlê kong kơdrâm dêi kong pơlê hiăng tơleăng, túa tối ƀă tah lôi 101 tơdroăng ăm khu tê mơdró. Ƀă tơdroăng ki ối tơvâ tơvân kong pơlê Kon Tum pơkâ klêi kơ’nâi 10 hâi tiú cheăng ai hnoăng thế ai troăng tơleăng, pơtroh mơ-éa tiâ rơkong khu tê mơdró ƀă tơbleăng Vi ƀan kong pơlê séa ngăn tâi tâng.