Riân troh hâi lơ 6/3, kơdró têa dêi 172 rơchôa têa tung kong pơlê Kon Tum xuân ối dâng sap ing 50%  - 70% kơxô̆ têa. Tung 20 rơchôa têa kân dêi kong pơlê, môi tiah: Đăk Uy, Đăk Yên, Đăk Rơnga ƀă hía hé, têa xuân pêng plế tíu mơ’no têa. Tiô riên ngăn, kơnhŏng têa ing mâu rơchôa kô tơniăn ăm pêt mơjiâng tơmeăm rơnó xeăng tô. Laga, kong pơlê Kon Tum ôh tá tơngôu, dế pêi pro hên troăng vâ tơniăn bê têa tôh ăm loăng plâi tung mâu khế mơ’nui rơnó tô khăng khoăng.

Rơnó xeăng tô hơnăm kố lâp kong pơlê Kon Tum pêt vâ chê 7.000 hectar báu klâng, vâ chê 5.000 hectar alâi ƀă lối 1.000 hectar kơchâi drêh tŭm túa. Rơtế ƀă tơniăn têa tôh ăm ƀăng deăng loăng plâi kố, kơvâ pêi chiâk deăng kong pơlê Kon Tum xuân thế tơniăn kơnhŏng têa tôh ăm chât rơpâu hectar loăng plâi ton hâi ƀă plâi kâ.