Mơdêk pơkâ pêi plah, ki kơnâ dêi roh leh, Đăi tă Lê Bá Quân, Kăn phŏ pơkuâ lêng – Kăn pơkuâ tơbleăng tơdroăng cheăng Kơpong 2 Khu lêng gâk kring têa kơxĭ pơkâ mâu khu râ kăn pơkuâ hnê ngăn cheăng Đảng, kăn pơkuâ mâu khu râ pơtối pơkuâ, hnê mơhno pêi lĕm tro tơdroăng pơtâng tối, hnê hriâm ăm kăn ƀô̆, mâu lêng ‘na pơkâ pêi plah, ki kơnâ dêi tơdroăng pêt loăng; hnoăng cheăng, ki tơdjâk kân, ki pơxúa tâi tâng, ton xŏn, ki kơnâ rơkê dêi tơdroăng pêt loăng ƀă rak ngăn loăng ngiât lĕm tơtro ƀă pơkâ pêi đông lêng, ‘na tơnêi tơníu, kơxô̆, khu loăng.

Đăi tă Lê Bá Quân tối ăm ‘nâi: Tung la ngiâ, Khu xiâm pơkuâ lêng Kơpong 2 Khu lêng gâk kring têa kơxĭ ƀă mâu tíu cheăng kô pơtối pêt nếo lối 3.000 xiâm loăng ngiât vâ mơjiâng pro kong prâi lĕm, đông lêng ki păng ‘nâng, ngiât, krúa, lĕm.