Ô vâi krâ-nhŏng o, pú hmâ ƀă mâu lêng tung lâp tơnêi têa!

Môi rơnó Hơngui nếo Qúy Mão hiăng troh a tơnêi têa Việt Nam ai hên tơdroăng ki mơjo pâ dêi rêm ngế pin! A chôu phut vâ tơklâ pơ’lâng hơnăm ton ƀă lo hơnăm nếo ƀă tơdroăng ki ƀriê phoih tung hiâm mơno kố, teăng mâ khu kăn xiâm pơkuâ hnê ngăn Đảng, ƀă Tơnêi têa, á pơtroh rơkong pơtroh tâi tâng vâi krâ-nhŏng o, mâu pú, khu lêng tung lâp tơnêi têa, mơngế Việt Nam rêh ối, pêi chăng a kong têa ê hiâm mơno mơjo pâ ki lĕm tro, rơkong tơpui tơno, êng tiâ ki nhên khât ƀă rơkâu hâk phiu hơnăm nếo lĕm tro má môi. Á xuân pơtroh tâi tâng mâu pú hmâ tung 5 pâ plâi tơnêi, kuăn pơlê mâu kong têa tung lâp plâi tơnêi rơkong rơkâu tơdroăng ki hơniâp lĕm, tơrŭm, nhŏng o ƀă đi đo mơnhông!

Hơnăm Nhâm Dần-2022 nếo prôk luâ ai hên tơdroăng ki ối chôu vế - môi hơnăm ai hên tơdroăng xahpá, pơloăng mơnúa kân, tơdroăng ki kơdrâ ai, pro tơdjâk ‘mêi, hên kơvâ cheăng ƀă ai tơdjâk trâu ó ti xê to a tơnêi têa pin mê ối tơdjâk troh lâp plâi tơnêi. Tung pơla ai mâu tơdroăng tiah mê, tâi tâng Đảng, tâi tâng kuăn pơlê, tâi tâng khu lêng pin athế pơtối mơdêk tơdroăng ki mơjo pâ dêi tơnêi têa ki trâu hơngế, ai hiâm mơno khŏm mơ-eăm, krá chân, tơrŭm, hlê plĕng tiô túa ki tơtro, hloh hlê rơkê plĕng, kơdo mơ-eăm pêi pro châ hên mâu hnoăng cheăng kal kân, tŭm têk hên tơdroăng, ai hên túa cheăng ki mơhno a mâ pin: Rế tơkŭm hbrâ, tơplâ, mơdât, pơlât pơreăng, rế khŏm mơ-eăm vêh mơnhông ƀă mơdêk pêi cheăng kâ, rêh ối pơlê pơla, mơjiâng tơdroăng pêi cheăng kâ ki tơná pin pơkuâ krê xêh, hnối kal athế tơrŭm kơhnâ khât ƀă mâu kong têa ê tung lâp plâi tơnêi trâu rơdâ, tŭm têk kơvâ cheăng, trâu hơngế ƀă châ tơƀrê; tơdroăng pơkuâ ngăn tơnêi têa pơlê pơla tơniăn, tơdroăng cheăng lêng, kring vế pơlê pơla, tơnêi têa châ tơniăn; rak vế krá khât tơdroăng châ hơniâp lĕm, tơniăn vâ mơnhông tơnêi têa; ‘mâi rơnêu ƀă thăm mơdêk tuăn loi tơngah dêi kuăn pơlê ƀă Đảng, ƀă tơnêi têa ƀă troăng hơlâ xah hô̆i chuh ngiah, chôu ‘măn ăm tơdroăng ki lĕm tro, châ kuăn pơlê ƀă pú hmâ lâp plâi tơnêi vêh mơnhên tối, séa mơnhên ngăn khât, ăm pin hên mâu ƀai mơhriâm ki kơnía git. Teăng mâ khu kăn xiâm pơkuâ ngăn Đảng ƀă tơnêi têa, á hâk kơdeăn, rơkâu, mơnê kơ vâi krâ-nhŏng o, pú hmâ ƀă mâu lêng tung lâp tơnêi têa ‘na tơdroăng hiăng châ chiâng pêi pro, hnoăng cheăng ki kân ƀă hnoăng cheăng ki veăng kum kân khât tung hơnăm nah.

Hvêa chêng mot tung hơnăm nếo Quý Mão - 2023 cho hơnăm ki má 3, hơnăm ki po troăng ahdrối, cho ai pơxúa kân kâl khât tung tơdroăng rak vế, pêi pro tơdroăng pơkâ dêi Hneăng hôp kân lâp tơnêi têa roh má 13 dêi Đảng ƀă tơdroăng pơkâ mơnhông pêi cheăng kâ-rêh ối pơlê pơla 5 hơnăm sap ing hơnăm 2021-2025. Ƀă hiâm mơno, tuăn tơmiât ƀă ki khŏm mơ-eăm mơnhông tơnêi têa rế hiá rế rơdêi ó, kro mơdrŏng, hơniâp ro, tâi tâng Đảng, tâi tâng kuăn pơlê, tâi tâng khu lêng kal pơtối mơnhông hiâm tuăn mơjo pâ tơnêi têa, hnoăng cheăng tơrŭm môi tuăn, tơkâ luâ mâu tơdroăng ki xahpá, pơloăng mơnúa, thăm mơdêk tâi tâng ƀă a drêng luâ tâ nếo tung hneăng hơ’lêh nôkố; mơjiâng ƀă kring vế krá tơniăn Tơnêi têa; rak ngăn tơdroăng hơniâp lĕm, tơniăn, pêi pro ƀlêi chiâng mâu tơdroăng cheăng xiâm, hnoăng cheăng hiăng pơcháu, ing mê, mơjiâng ivá ó rơdêi, hiâm mơno thăm mơdêk tơnêi têa mơnhông rĕng ƀă krá tơniăn tung mâu hơnăm pơtối, veăng kum mơjiâng tơnêi têa mơjo pâ dêi tơná pin thăm rế mơnhông, kro mơdrŏng, rế hiá rế lĕm ro tâ, kân kĕng ó tâ.

Tung chôu phut ki hơniâp ro, sôk suâ koh tơdah hơnăm nếo Quý Mão, pa môi hdroh nếo, á rơkâu pâ tâi tâng vâi krâ-nhŏng o, pú hmâ, rêm rơpŏng hngêi, rêm ngế kuăn pơlê Việt Nam mot tung hơnăm nếo ai hên ivá mo rơdêi, hên tơdroăng phiu ro, hơniâp lĕm ƀă ƀlêi chiâng.

Hâk phiu rơnó Hơngui nếo, khŏm mơ-eăm nếo, hnoăng cheăng nếo, ki rơkê plĕng nếo, hên tơdroăng ƀlêi trâng nếo. Rêm rơpŏng hngêi hơniâp ro, rêm ngế hơniâp lĕm!

Koh mơnê.