Kuân đoân 3 châ mơjiâng a hâi lơ 26/3/1975 tung tơdroăng ki tơrŭm tâi tâng khô̆i mố đô̆i xiâm a Tây Nguyên chiâng Kuân đoân xiâm cơ đô̆ng. Kuân đoân 3 hiăng mơhno hnoăng cheăng cho tíu pêi cheăng ki xiâm, veăng kum kân khât tung tơdroăng tơleăng lĕm Tây Nguyên ƀă prôk troh tơleăng lĕm tâi tâng peăng Hdroh, pro tơnêi têa tơrŭm chiâng môi a hâi lơ 30/4/1975.

Tung hnoăng mơjiâng, rak vế Tơnêi têa, Kuân đoân 3 hiăng tơrŭm krá ƀă khu râ Đảng, kăn pơkuâ ƀă kuăn pơlê mâu hdroâng kuăn ngo a tíu ki bro đông; veăng kum kal khât ăm tơdroăng ki mơnhông cheăng kâ, kring vế tơdroăng cheăng lêng dêi Gia Lai tối krê, mâu kong pơlê a Tây Nguyên tối tơdjuôm.

Ƀă mâu rôh tơplâ ƀă tơdroăng ki tơƀrê rơkê tung tơplâ ƀă tung hnoăng cheăng mơjiâng ƀă rak vế Tơnêi têa, Kuân đoân 3 hâk tơngăm châ Đảng ƀă Tơnêi têa diâp inâi Ngoh khên tơnôu Khu lêng kring vế tơniăn Kuăn pơlê a hâi lơ 20/12/1979; 81 khu pú hên ƀă 47 ngế krê châ Đảng, Tơnêi têa diâp inâi Khu khên tơnôu lêng kring vế kuăn pơlê. Tung mê ai 9 khu pú hên châ khěn kơdeăn inâi Ngoh khên tơnôu rôh má péa; lưh đoàn CB7 ƀă Trung đoàn BB66 châ khěn kơdeăn inâi Ngoh khên tơnôu rôh má pái tung chal hơ’lêh nếo.