Sap ing hâi kố lơ 1/7, Lâm Đồng, Bình Thuận ƀă Dak Nông păng 'nâng ‘mot tơkŭm, chiâng kong pơlê Lâm Đồng nếo, ai ƀăng tơnêi kân má môi tung lâp tơnêi têa, pơ’leăng mâ mơngế hên má môi Nam Trung Bộ ƀă Tây Nguyên. A Dak Nông, kuăn pơlê pơkâ hên tơdroăng tơngah klêi kơ’nâi ‘mot tơkŭm kô pro chiâng ivá mơnhông rơdêi ăm kong pơlê mơnhông cheăng kâ rêh ối pơlê pơla, malối cho ôm hyô drêng xúa ki rơdêi dêi mâu kong pơlê ki hiăng ai hlâu ‘na ôm hyô.

Ngoh Nguyễn Anh Quốc, a pơlê kân Ea T’Ling, tơring Čư̆ Jut, kong pơlê Dak Nông (hdrối nah) ăm ‘nâi, sap ing mơjiâng, hơnăm 2004, kong pơlê hiăng mơnhông rĕng, tơdroăng rêh kâ ối hlo pơhlêh rĕng. Ngoh Quốc tơngah, drêng ‘mot tơkŭm ƀă péa to kong pơlê ai hên ki pơxúa ‘na ôm hyô cho Lâm Đồng ƀă Bình Thuận, Dak Nông kô châ ai tơ’nôm ivá, mơnhông tơniăn mâu ivá rơdêi ki hiăng ai hlâu.

Ƀă pôa Điểu Nơi, krâ pơlê, hdroâng M’Nông, krâ pơlê a ƀon Diêng Ngaih, cheăm Dak R’Tih, tơring Tuy Đức (hdrối nah) tơngah, ‘mot tơkŭm 3 to kong pơlê kô pro hvêa prôk mơnhông ăm kong pơlê. Kong pơlê nếo kô ai túa cheăng kâ kân ƀă kô tơmâng ‘no liăn ăm kơpong hngế hngo môi tiah ƀon Diêng Ngaih:

“ Hiăng ‘mot tơkŭm mê vâi krâ kuăn pơlê M’Nông a Dak R’tih xuân ối mơheăm pêi cheăng kâ, môi hiâm mơno tiô Đảng, Tơnêi têa. Mơngế M’Nông púi vâ klêi kơ’nâi ‘mot tơkŭm kô mơnhông tơniăn tâ kơpong hdroâng kuăn ngo, kăn pơkuâ kong pơlê nếo kô tơmâng ngăn ‘no liăn pro mâu tơmeăm khoăng ăm kơpong hdroâng kuăn ngo tung mê ai vâi krâ kuăn pơlê a Dak R’Tih. Troăng kân kô po vâ vâi krâ kuăn pơlê prôk lăm tơ’lêi hlâu, tê mơdró xuân tơ’lêi hlâu há”.