Tơdroăng a bêng Bồng Sơn, kong pơlê Gia Lai – môi tung mâu bêng rĕng tơbleăng bro mâu kơpong pro pơlê ối vâ xo tơnêi pro troăng rơxế lơ treng sap ing Kơnhŏng troh peăng Hdroh, ăm hlo tơdroăng ki veăng pêi pro tơdâng tơ’mô dêi kăn pơkuâ ƀă tơdroăng pêi pro môi tuăn sap ing kuăn pơlê. Klêi kơ’nâi châ hnê tối, mơhnhôk ‘na troăng hơlâ xo tơvêh tơnêi, hên rơpŏng kuăn pơlê a kơphô̆ Thiết Đính Nam hiăng tơrŭm, hbrâ rơnáu pơcháu tơnêi. Rơpŏng jâ Trần Thị Thu cho môi tung mâu rơpŏng hiăng rĕng pơcháu lối 1.000m2 tơnêi klâng ƀă hơniâp ro tơdah xo liăn chêl thiê̆n.

“Nôkố Tơnêi têa xo tơvêh tơnêi vâ pêi cheăng mê châ pơxúa ăm kuăn pơlê pin, á môi tuăn khât ƀă tơdroăng ki mê, bô bố xuân ro tâi tâng”.

Tơdroăng ki môi tuăn mê ôh ti xê cho tơdroăng ki tơ’lêi hlâu, mê cho pơxiâm sap ing túa pêi ki rơkê, tro ƀă tơdroăng ki ai khât dêi kăn pơkuâ bêng. Sap ing tơdroăng ki hôp kuăn pơlê, hnê tối, tơpui tối leăng troăng hơlâ ƀă tâi tâng pơrá châ tơbleăng tơdâng tơ’mô, tơdrăng. Pôa Lê Văn Phúc, Ngế pơkuâ kơpong kơphô̆ Thiết Đinh Nam, bêng Bồng Sơn ăm ‘nâi, drêng kuăn pơlê hlê nhên troăng hơlâ pơkâ pêi mê cheăng tơbleăng pro chiâng tơ’lêi hlâu tâ hên.

“Bêng tơmâng ngăn khât, khu kăn pơkuâ kơpong kơphô̆ tơkŭm po hnê tối, chêh pro túa pơkâ vâ hôp khu. Vâi krâ kuăn pơlê mê vâi môi tuăn khât tung tơdroăng pro pơlê nếo vâ gum cheăng pro tơdroăng tơkêa troăng rơxế lơ treng sap ing peăng Kơnhŏng troh peăng Hdroh. Tâi tâng mâu rơpŏng kuăn pơlê tung mâu rơpŏng ki châ xo tơnêi mê hiăng xo tŭm liăn, tối tơdjuôm kuăn pơlê vâi môi tuăn khât”.

Tơdroăng ki môi tuăn xuân tơdjâk troh lâp lu a bêng Hoài Nhơn Bắc – tíu ki ai lối hrĭng rơpŏng kuăn pơlê tro tơdjâk troh tơdroăng tơkêa. Rơpŏng ngoh Nguyễn Văn Phán, kơphô̆ Hy Văn hiăng pơcháu 2 ƀăng tơnêi klâng cho 1.500m2, môi tuăn khât ƀă troăng hơlâ pơkâ dêi Tơnêi têa:

“Rơpŏng ngin xuân môi tiah vâi krâ nhŏng o ki ê a kơphô̆ Hy Văn kố hiăng môi tuăn ƀă tơdroăng ki xo tơvêh tơnêi, túa pơkâ kơpong kố. Xua akố vâi krâ kuăn pơlê phiu ro xua troăng hơlâ mơnhông cheăng kâ rêh ối pơlê pơla dêi bêng mê vâi krâ kuăn pơlê vâ môi tuăn khât”.

Vâ châ tơdroăng ki môi tuăn mê, rêm râ kăn pơkuâ kong pơlê Gia Lai hiăng hbrâ rơnáu tơbleăng hên troăng hơlâ pêi tơdâng tơ’mô, sap ing chêh pro túa pơkâ xo tơnêi pro pơlê ối troh riân ngăn, chêl thiê̆n ƀă tŏng gum kuăn pơlê. Pôa Trần Minh Tâm – Phŏ Kăn hnê ngăn Vi ƀan bêng Hoài Nhơn Bắc ăm ‘nâi, cheăng hnê tối pơtối châ mơnhên cho cheăng ki kal pêi tơdrêng tá troh drêng hiăng klêi ah tơdroăng cheăng chêl thiê̆n, xo tơnêi.

“Ngin pơtối hnê tối ăm kuăn pơlê hlê nhên ‘na mâu kế tơmeăm pro ki kal dêi tơnêi têa vâ pro châ tơdroăng ki môi tuăn dêi kuăn pơlê pơtối tơdah xo ƀă mâu troăng prôk ki xiâm dêi troăng rơxế lơtreng. Ki kal cho hnê tối vâ kuăn pơlê môi tuăn tŏng gum vâ cheăng chêl thiê̆n tơnêi châ tơ’lêi hlâu ƀă rĕng pơcháu tơnêi ăm tơdroăng tơkêa bro vâ pêi cheăng”.

Tung tơdroăng tung lâp kong pơlê Gia Lai, tơdroăng tơkêa bro troăng rơxế lơ treng ing Kơnhŏng troh Hơdroh tơkâ luâ 8 to cheăm, bêng, tơdjâk troh vâ chê 4 rơpâu rơpŏng kuăn pơlê, ƀă tâi tâng kơxô̆ liăn chêl tơnêi vâ chê 6.800 rơtal. Troh nôkố, kong pơlê Gia Lai hiăng chêh pro klêi túa pơkâ 38 kơpong pro pơlê ối, rak tơniăn tŭm tíu ối ăm mâu rơpŏng kuăn pơlê ki tro tơdjâk. Tiô pôa Nguyễn Tự Công Hoàng, Phŏ kăn hnê ngăn Vi ƀan kong pơlê Gia Lai, vâ rak tơniăn tơdroăng pơkâ tơdjuôm, kong pơlê rak vế lăm ngăn tơdroăng pro, hlối hbrâ rơnáu kơxô̆ liăn, teăm chêl thiê̆n liăn ngân ăm kuăn pơlê.

“Tung la ngiâ ah mâu cheăm bêng kal pêi pro kơtăng ƀă rĕng tâ nếo. Mơnhên tíu ki lâi châ kơjo xo tơnêi vâ pro troăng ăm tíu pêi cheăng pro. Pơkâ thế mâu cheăm bêng ôh tá kal séa ngăn tâi tâng mê nếo pơkâ yă mê séa ngăn riân ngăn troh lâi mơnhên troh mê pơkâ yă troh mê, chêl thiê̆n ngân ăm kuăn pơlê troh mê ƀă pơcháu tơnêi ki kuăn pơlê hiăng xo liăn chêl thiê̆n klêi”.

Ƀă tơdroăng veăng pêi pro tơdâng tơ’mô dêi khu pơkuâ cheăng kal kí ƀă malối cho tơdroăng môi tuăn dêi Kuăn pơlê, cheăng xo tơnêi pro tơdroăng tơkêa troăng rơxế lơ treng sap ing Kơnhŏng troh Hdroh a Gia Lai dế pêi châ mâu tơdroăng tơƀrê chiâng. Kố cho ivá ki kal vâ tơdroăng tơkêa bro ki kal kố dêi tơnêi têa rĕng châ tơbleăng pro, pro ivá mơnhông nếo ăm kơpong Tây Nguyên ƀă lâp tơnêi têa.