Kơxo lơ 7/4, Vi ƀan Kuăn pơlê vâ ƀă Séa ngăn dêi Kuô̆k hô̆i tơkŭm po roh hôp tâi tâng roh má môi. Xông tơpui a roh hôp, pôa Nguyễn Doãn Anh, Phŏ Kăn xiâm hnê ngăn Kuô̆k hô̆i rơkâu Vi ƀan Kuăn pơlê vâ ƀă Séa ngăn dêi Kuô̆k hô̆i hneăng má XVI châ rah xo tŭm tâi tâng ƀă 35 ngế, tơdrêng amê kheăn kơdeăn tơdroăng ki thâ mơjiâng tơdroăng pêi cheăng vâ pêi pro hnoăng cheăng xiâm hơnăm 2026.

Tối nhên pơkâ pơhlêh nếo, mơdêk châ tơƀrê séa ngăn, pôa Nguyễn Doãn Anh, Phŏ Kăn xiâm hnê ngăn Kuô̆k hô̆i tối tơdroăng kố kô trâm hên pơloăng mơnúa, pơkâ thế pơhlêh nếo troăng pêi, tơdroăng ki xiâm vâ tơxâng tơdroăng nôkố.

Tơdroăng séa ngăn kal pêi tiô Tơdroăng pơkâ Hneăng hôp má XIV dêi Đảng mâu pơkâ, troăng pêi cheăng ton xŏn dêi Khu xiâm tơnêi têa ƀă Khu xiâm kal kí, xuân môi tiah mơnhên troăng prôk la ngiâ tung xông tơpui hnê mơhno dêi Kăn xiâm pơkuâ hnê ngăn Đảng a roh hôp apoăng dêi Kuô̆k hô̆i hneăng má XVI. Hơnăm 2026, Vi ƀan kô veăng tơbleăng mơjiâng mâu tơdroăng tơkêa bro ki kal vâ mơdêk châ tơƀrê séa ngăn.