Kơxo lơ 7/4, a roh hôp má Môi, Kuô̆k hô̆i hneăng má XVI pơtối rah xo kăn xiâm pơkuâ Tơnêi têa.

Pôa Tô Lâm, Kăn xiâm pơkuâ hnê ngăn Đảng châ mâu kăn xiâm teăng mâ Kuô̆k hô̆i loi tơngah rah xo pro Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam hneăng hơnăm 2026 – 2031.

Tơdroăng pơkâ rah xo to pro Kăn xiâm hnê ngăn tơnêi têa châ mâu kăn teăng mâ Kuô̆k hô̆i têk kŏng môi tuăn tơbleăng ƀă 495/495 ngế kăn teăng mâ Kuô̆k hô̆i veăng têk kŏng môi tuăn. Klêi kơ’nâi châ Kuô̆k hô̆i rah xo, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng pơchuât hiâm tuăn tơhrâ drêng to pro kăn: ‘’Pá kơdâm hlá cơ khêi hơlŏng trĭng krip krih dêi Tơnêi têa, a ngiâ Kuô̆k hô̆i, kuăn pơlê ƀă mơngế tâ phĭu lâp tơnêi têa, Á, Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam pâ pơchuât tơhrâ: Môi ihiâm môi mơno ƀă Tơnêi têa, ƀă kuăn pơlê, ƀă Luât tơnêi têa Kŏng hoa xah hô̆i chuh ngiah Việt Nam, mơ-eăm tâi ivá, pêi kêi đeăng tâi tâng rêm hnoăng cheăng ki châ Đảng, Tơnêi têa ƀă kuăn pơlê hiăng pơcháu’’.

Xông tơpui to pro kăn klêi kơ’nâi mê, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối mơnê mơngế tâ phĭu ƀă kuăn pơlê lâp tơnêi têa ƀă hiâm tuăn pôu râng hnoăng cheăng, pói tơngah mơjiâng pơlê xiâm, tơnêi têa ƀă tơdroăng loi tơngah môi ihiâm môi mơno a Đảng Kŏng san Việt Nam hiăng pro chiâng roh tâ phĭu rak xo kăn teăng mâ Kuô̆k hô̆i hneăng má XVI ƀă kăn teăng mâ Hô̆i đong kuăn pơlê mâu râ hneăng hơnăm 2026 – 2031 châ tơƀrê, châ tơtro lĕm tro.