Tiô tối hdrối tâi tâng hâi pêi cheăng dêi Roh hôp cho dâng 11 hâi, klâ chiâng 2 roh (Roh má 1: sap ing hâi lơ 6/4 troh hâi lơ 12/4; Roh má 2: sap hâi lơ 20/4 troh hâi lơ 23/4/2026). A roh hôp kố, Kuô̆k hô̆i kô tơkŭm po tơdroăng tơkŭm po pêi cheăng, mâu kăn xiâm dêi khu kăn xiâm Tơnêi têa, séa ngăn tơbleăng ăm pêi pro 8 tơdroăng tơkêa bro luât, 1 hlá mơ-éa chêh hdrối tơdroăng pơkâ luât; tơdrêng amê séa ngăn, pơkâ mâu tơdroăng pơkâ pêi cheăng kân dêi Tơnêi têa ‘na mơnhông cheăng kâ – rêh ối pơlê pơla, rak tơniăn gâk kring tơnêi têa, liăn ngân tơnêi têa, mơ’no liăn cheăng tơnêi têa, mung liăn chêl liăn chĕn tơnêi têa tung hneăng 5 hơnăm la ngiâ.

Pơtối mê, Kuô̆k hô̆i kô rah xo mâu kăn tơdrêng, mê cho: Kăn xiâm hnê ngăn Kuô̆k hô̆i, mâu Phŏ Kăn xiâm hnê ngăn Kuô̆k hô̆i, Kăn cheăng tung Vi ƀan pơkuâ Kuô̆k hô̆i, Kăn xiâm hnê ngăn tơnêi têa, Phŏ Kăn xiâm hnê ngăn tơnêi têa, Ngế pro xiâm hnê ngăn Chin phuh, Kăn xiâm Hngêi tơleăng kuăn pơlê râ xiâm, Kăn pơkuâ Kơ koan hnê arak luât kuăn pơlê râ xiâm, Kơ koan xiâm riân kế tơmeăm khoăng Tơnêi têa.

Tơdrêng amê, Kuô̆k hô̆i xuân kĭ pơkâ rah xo mâu kăn cheăng tung Chin phuh mê cho: mâu Phŏ Ngế pro xiâm hnê ngăn Chin phuh, mâu Ngế xiâm ƀă mâu kăn cheăng dêi Chin phuh rơtế mâu kăn pêi cheăng ki ê ối tung hnoăng pơkuâ. Tiô pơkâ dêi Luât hơnăm 2013, klêi kơ’nâi châ Kuô̆k hô̆i rah xo, Kăn xiâm hnê ngăn Kuô̆k hô̆i, Kăn xiâm hnê ngăn tơnêi têa, Ngế pro xiâm hnê ngăn Chin phuh, Kăn pơkuâ hngêi tơleăng xiâm kuăn pơlê kô pơchuât tơkêa to pro kăn a ngiâ Kuô̆k hô̆i.