A rôh trâm mâ, tối nhên tơrŭm tiah hmâ ƀă troăng hơlâ dêi Đảng, Tơnêi têa, Chin phuh Việt Nam tung tơdroăng kơjo pêi ahdrối tơrŭm cheăng ƀă Sinuâ, pôa Phạm Minh Chính, Ngế pro xiâm thê ngăn tơnêi têa púi vâ péa tơnêi têa pơtối mơdêk tơrŭm, ‘mâi mơnhông ki loi nhoăm, mơdêk tơrŭm tung tŭm tơdroăng cheăng, kơjo kum dêi rơpó rơtế mơnhông.

‘Na tơrŭm cheăng tung la ngiâ, pôa Phạm Minh Chính pâ thế péa pâ mơ-eăm mơdêk tê mơdró péa pâ tiô troăng hơlâ tơdâng tơ’mô, krá tơniăn, po troăng hlâu ăm tơmeăm pê lo ing chiâk deăng, ká xi xŏng ƀă mơnăn păn dêi Việt Nam châ tê, pro tơbrê ‘na tơdjêp pro tơmeăm khoăng, pêi ahdrối ăm tơrŭm pro troăng rơxế lơ treng vâ tơdjêp pơla péa tơnêi têa ƀă kơpong Đông Nam Á,  Trung Á, châu Âu; mơdêk tâ nếo tơrŭm cheăng ‘na on tơhrik, liăn ngân, hngêi rak liăn; mơdêk tơrŭm túa lĕm tro, ôm hyô, pro hlâu ăm tơdroăng mot lo dêi tơmối péa pâ.