A roh hôp, tơpui tơno mê, mâu ngê̆ sih xup um hiăng ai tơpui tơno mơnhên ‘na tơdroăng cheăng ki dêi tơná troh ƀă tơdroăng xup um ƀă tơdroăng ki mơhúa dêi tơná cho rah kơvâ cheăng xup um tiô  khôi túa, vêa vong dêi mâu hdrông kuăn ngo. Ai hên mâu ngế ki rơkê tối tiah kố, ing tơdroăng ki ai hên túa, hên tơlá tung rêh kâ ối, khôi túa, vêa vong ƀă xiâm rêi ki ối tơrak vế dêi túa lĕm tro mê hiăng pro ăm mơngế ki râng kơmăi xup um thăm rế rơ-rêk, phoih ƀriê tung i hiâm mơno vâ xup drăng tí ki lĕm ki tro, ki pro rơ-rêk.

Tiô ngê̆ sih xup um Nguyễn Xuân Chính, a Hà Nội, vâ khoh châ ai mâu kơtâ um ki kơnâ ngê̆ thuât, mê mâu ngê̆ sih athế mơdoh hên hâi khế vâ tí tăng hlê plĕng, rêh kâ ối ƀă mâu ngế ki mê ƀă hnối mơnê nhoăm ki kơnía git dêi túa lĕm tro dêi rêm hdrông kuăn ngo, rêm kơpong, rêm pơlê pơla.

“Kố cho môi túa ki pá puât, pá păng ‘nâng vâ khoh chiâng xup xo. Ahdrối vâ chiâng xup xo mê ing tơná á athế tí tăng hlê plĕng, athế pơchuât i nhên tung hlá mơ-éa ‘na khôi túa, vêa vong kuăn ngo, vâ ing mê, vâ tí tăng hlê plĕng ‘na khôi túa, vêa vong ki trâu rơdâ khât dêi kuăn ngo ki mê vâ pro ti lâi drêng troh trâm ƀă mâu ngế ki mê ƀă pin nếo khoh chiâng vâ tí tăng xup tơbro ăm ga i lĕm krip, tí tăng hlê plĕng i nhên tâ ‘na kuăn mơngế, vâ ing mê, pro ti lâi châ pơ-ô, châ tơbleăng thăm rế lĕm tro mâu tơdroăng ki kơnía git mê dêi rêm hdrông kuăn ngo”.

Mâu nguê̆ sih xuân hiăng tối nhên mâu tơdroăng ki xahpá tung hneăng ki lăm troh a mâu pơlê pơla, cheăm bêng ki hơngế hơngo; tơdroăng ki pá ‘na rơkong tơpoui tơno, lơ mâu roh ki vâ châ trâm kuăn pơlê. Méluâ ti mê, ing mâu tơdroăng ki pơloăng mơnúa, ki pá puât mê pơkal athế mâu ngế ngê̆ sih athế thăm rế ai i hiâm tuăn kâi chân, rơkê plĕng ƀă pôu râng hnoăng cheăng vâ pêi pro ăm tơdroăng xup um ăm ti lâi khoh chiâng kơnía git khât.

Ing tơdroăng ki ai khât, cho ‘nâng ki pá puât, ki lĕm tro tung xup um, mâu ngê̆ sih hiăng hriăn tơmiât ƀă xup xo trâu rơdâ vâ hơ’muăn tối ‘na khôi túa, vêa vong dêi kuăn ngo, dêi tơdroăng rêh kâ ối, ing mê, veăng gum pro lân lĕng rơdâ rơdih ki kơnía git dêi khôi túa, tơlá, vêa vong dêi mâu hdrông kuăn ngo tung rêh kâ ối nốkố; ing mê, po troăng ăm troăng prôk ki nếo tung hnoăng ki tơmiât hriăn vâ ai um xup ki lĕm kơnía git má môi.

Ngê̆ sih xup um Vũ Duy Thương, ối a bêng Tân Lập, kong pơlê Dak Lak tối ăm ngin ‘nâi:

“Ing mâu tơdroăng ki tơpui tối ‘na hnoăng cheăng ki mê hiăng chiâng ai tơdjâk troh ăm dêi tơná á pro ti lâi vâ kơdroh iâ chôu phut ki hngăm hngo, ki mơdoh mơdon, mê pơkal athế pêi pro mot trâu rơdâ hlối tung  túa lĕm tro, tơdroăng ki ai khât, ki păng ‘nâng, trối mâu tơdroăng hiăng tơpui tối, pin ôh tá khoh xup bro mâu tơdroăng ki phá tơ-ê, ôh tá xê khât, pơkal athế xup um ki ai păng ‘nâng, rak vế khôi túa, vêa vong athế rak vế ki tơtro khât, ki mê cho tơdroăng ki kal kân khât. Mê xuân cho troăng hơlâ ăm mâu ngế rơxông nếo vâ pro ăm dêi hlê plĕng trâu rơdâ tâ, tro păng ‘nâng tâ ƀă pơtối kơdo mơ-eăm athế rak vế, pêi pro tro khâp hnoăng cheăng dêi ngê̆ thuât xup um, thăm pro ăm ngê̆ thuât ga rế xông tơtêk a’ngêi hên tâ”.