Lối 15 hơnăm ối a hơpiâp on dêi hên hngêi tê kơchâi kâ ki châ ô eăng a Quy Nhơn, ngoh Huỳnh Tấn Dũng, ngê ki pế kơchâi kâ dêi rơpŏng ‘’Kong pôh’’ a bêng Quy Nhơn đi đo tơmiât ƀă tơdroăng hâk vâ kơchâi kâ Tây  Nguyên. Ngoh Dũng tối ăm ngin ‘nâi: Tơmối troh a  Quy Nhơn, Gia Lai hâk vâ kâ ‘nâng mâu kơchâi dêi kơpong kân rơdâ, môi tiah pú pái, ro prông tung klŏng phêa lơ í prăng, chu ké ‘ngré ‘ngró pôh ƀă kơchâ khâng.

“Á xuân vâ mơnhông pro tơmeăm kâ pơlê pin thăm rế kơhiâm ƀă mâu kế ki lâi ki pin hiăng ai. Á pơchên kơchâi kâ vâ pơtroh tơdroăng hnê pơtâng troh mâu nâ  o, xăng,  tăm, miê cho vâ mơnhông bro kơchâi kâ dêi pin, vâ tơrŭm ƀă mâu ngế ki pế pơchên, kế ki râm xuân hiăng ai a pơlê pin xuân môi tiah a Việt Nam pin vâ mâu tơmối drêng troh a Việt Nam xuân môi tiah troh Gia Lai, troh kơphô̆ têa kơxĭ pin kô châ kâ mâu kơchâi kâ Việt Nam pin đi đo tá hiâm mơno, lĕm ro’’.

Hdrong têa kơxĭ âp ƀă mơheăm Hdrong têa kơxĭ, ká Chình pôh kơchâ khâng, lâuh Xi xŏng kân têa kơxĭ, Hàu têa kơxĭ pôh ƀă phô mai, ká dìa têa kơxĭ pế mẳn… cho mâu kơchâi kâ ki ai kơhiâm, xú pơ-ou dêi têa kơxĭ, châ ngế pế pơchên kơchâi kâ mâu hngêi tê tơmeăm kâ a Quy Nhơn chêh tung inâi vâ tê ăm tơmối tung tơdroăng ki kal dêi Hơnăm Ôm hyô tơnêi têa – Gia Lai 2026.

Troh ƀă Quy Nhơn ôm hyô ƀă châ tâ tung hơnăm ôm hyô Tơnêi têa 2026, ngoh Trần Nhật Đông, tơmối a lo ing Pơlê kong kân Hồ Chí Minh tâ tiah kố:

“Kơchâi kâ Quy Nhơn cho hên hĭn, pakĭng tơmeăm, trối: ká, xi xŏng ối rêh mê á xuân châ kâ mâu kơchâi tung ngo kong Tây Nguyên môi tiah mâu kơchâi pôh, prông. Xăng ngeăm mê xuân tơtro ƀă kơpong peăng Kơnhŏng xuân môi tiah peăng Hdroh. Á tâdêi tơná môi tiah ối a hngêi há’’.

Jâ Nguyễn Thị Kim Chung, Phŏ Kăn pơkuâ Khu pơkuâ ‘na Khôi túa lĕm tro ƀă Tơ’noăng ivá kong pơlê Gia Lai tối, tung pơla Gia Lai chiâng tíu ki troh tung tơdroăng ki kal dêi Hơnăm Ôm hyô Tơnêi têa 2026, kơvâ Ôm hyô ‘na kơchâi kâ kong pơlê dế ai mâu troăng pơhlêh tơná inhên. Mâu khu tê mơdró, tíu tê kế kâ thăm mơdêk hlê plĕng hnoăng cheăng tung tê mơdró, tơmiât troh vâ mơjiâng um méa kơvâ ôm hyô ki lĕm ro, rơkê khât.

“Tung măng tĭng leh hơnăm ôm hyô tơnêi têa, mâu tíu cheăng tê mơdró ôm hyô tung kong pơlê hiăng ai tơdroăng ki hbrâ mơdêk ki dâi lĕm tê mơdró xuân môi tiah tơmeăm kih thuât, khu mơngế pêi cheăng vâ gum ăm tơmối. Mâu tíu cheăng xuân tơtrŏng hên ‘na tơmeăm má môi cho kơchâi, mâm kâ ki phá krê dêi kong pơlê. Thăm pơtâng tối, tơbleăng ăm hơnăm ôm hyô Tơnêi têa vâ pơtâng troh tơmối troh ôm hyô ‘na mâu tơdroăng ki kal tung hơnăm ôm hyô tơnêi têa’’.