Sap ing hâi lơ 11 troh lơ 13/4/2026 la ngiâ a Quảng Ninh kô po rôh tơ’noăng hlá tơbeăng lâp tơnêi têa rôh má 17 – Quảng Ninh 2026 dó inâi “Hlá tơbeăng xua Việt Nam ó rơdêi, kro mơdrŏng”. Kố cho tơdroăng ki châ mơ’no tối a rôh hôp tơbleăng ‘na Rôh tơ’noăng hlá tơbeăng lâp tơnêi têa rôh má 17 xua Rơ’jíu xiâm Việt Nam VOV tơrŭm ƀă Vi ƀan hnê ngăn kong pơlê Quảng Ninh tơkŭm po a kơxê lơ 30/3 a Tíu pêi cheăng Hlá tơbeăng Tơnêi têa 58 Quán Sứ Hà Nội. Tiô pôa Phạm Mạnh Hùng, Phŏ kăn pơkuâ Rơ’jiu Việt Nam, tơdroăng ki kal dêi Rôh tơ’noăng hơnăm kố cho rôh apoăng tơkŭm po hôp tơpui tơno lâp plâi tơnêi podcast, tơkŭm 35 ngế ki rơkê ƀă hên khu ngế ki rơkê kong têa ê.

Malối, Rôh tơ’noăng kố xuân cho rôh apoăng krếo thế mâu ngế ki châ̆m cho kong têa ê veăng ai mâ vâ châ̆m ƀai tiô túa podcast. Tơdroăng kố mơhno rế hía rế nhên dêi mâu ƀai pro Podcast, tối ‘na troăng mơnhông nếo dêi hlá tơbeăng idrâp tung chal xúa truyền thông hên túa. Tung rôh po tơ’noăng lâp tơnêi têa rôh má XVII po hên tơdroăng: Rôh hôp lâp plâi tơnêi: "Podcast –Troăng prôk rơkê ăm rơ’jíu tung chal kơxô̆”; Rôh hôp ‘na tơdroăng cheăng: “Tơpui mơ’no tơdrêng tung chal nếo – Túa ki vâ ăm kuăn pơlê rĕng châ tâng”; Mơgêi ƀă diâp Rôh tơ’noăng Hlá tơbeăng lâp tơnêi têa rôh má XVIII.