Mơđah tơbleăng 180 um dêi 131 ngê̆ sih xup um tung lâp tơnêi têa, xup tơdroăng rêh ối, khôi túa lĕm tro dêi 54 hdroâng mơngế Việt Nam. Mâu ƀai châ xup xo ing hên kơpong tung lâp tơnêi têa, mơhno inhên ki lĕm hên hĭn tung tơdroăng rêh ối, pêi cheăng, loi tơngah ƀă ếo pơtâk vâi krâ nah dêi rêm hdroâng kuăn ngo.

Tiô jâ Trần Thị Thu Đông, Kăn hnê ngăn Khu Ngê̆ sih Xup um Việt Nam, mơđah tơbleăng cho tơdroăng ki châ tơƀrê dêi roh mơhnhôk tung lâp tơnêi têa ƀă rah xo inhên tung kơxô̆ lối 4.000 um veăng tơ’noăng. Kố ôh tá xê to tơdroăng ngê̆ thuât mê ối gum mơđah tơbleăng um tơnêi têa, kuăn mơngế Việt Nam troh ƀă kuăn pơlê ƀă tơmối.

Ing mâu kơtâ um, khu tơkŭm po pói tơngah troh lâp lu tuăn pâ khôi túa lĕm tro vâi krâ nah, mơdêk hlê plĕng rak ƀă mơnhông khôi túa lĕm tro dêi mâu hdroâng mơngế tung tơdroăng rêh ối tiô rơxông nếo. Mơđah tơbleăng kô tơkŭm po troh tâi hâi lơ 6/4 la ngiâ.